Қашқадарё вилоятида Аёллар тадбиркорлигига катта эътибор қаратилмоқда

Янги Ўзбекистонда шиддат билан кечаётган янгиланиш жараёнлари ёшлар, хотин-қизлар ва аҳолининг турли қатламлари билим ва кўникмаларини ислоҳотларга мослаштириш, уларнинг профессионал ривожланишига янгича ёндашишни талаб этмоқда. Уларда тадбиркорлик ва бизнес кўникмаларини шакллантириш, касбий малакасини ошириш орқали иқтисодий ўсишни таъминлаш энг долзарб масалалардан бири ҳисобланади.

Мамлакатимиз раҳбарининг 2020 йил 11 август ПҚ-4804 сонли «Камбағал ва ишсиз фуқароларни тадбиркорликка жалб қилиш, уларнинг меҳнат фаоллигини ошириш ва касб-ҳунарга ўқитишга қаратилган ҳамда аҳоли бандлигини таъминлашга оид қўшимча чора-тадбирлар тўғрисида»ги қарори қабул қилинган ҳамда, 2021 йил 27 январь куни Президентимиз раҳбарлигида ўтказилган «Ёшлар бандлигини таъминлаш ва бўш вақтларини мазмунли ташкил этиш чора-тадбирлари тўғрисида»ги кенгайтирилган тарзда видеоселектор йиғилиши ўтказилган.

Қарорининг ижросини таъминлаш мақсадида аҳоли, ёшлар, хотин-қизларни кичик бизнес ва тадбиркорликка ўқитиш, янги иш ўринларини яратиш, камбағалликни қисқартириш, вилоятни молиявий-иқтисодий ўсиши, бизнес ва тадбиркорлик муҳитини яхшилаш ва тадбиркорларнинг сонини кўпайтириш бўйича кенг кўламли ишлар олиб борилмоқда.

Хусусан, Шаҳрисабз туман Ҳокимлик катта мажлислар залида ташкил этилган ўқув курсларини муваффақиятли тамомлаган 120 нафар хотин-қизларга сертификат топшириш маросими бўлиб ўтди.

Маросимда Вилоят хотин-қизлар тадбиркорлик маркази, Шахрисабз туман ҳокимлиги ва мутасадди ташкилотлар иштирок этишди.

Ташкил этилган ўқув курслари тасдиқланган кун тартиби ва дарс жадвали асосида ташкилланган бўлиб, айни жараёнда хотин-қизларнинг касбий ва интеллектуал салоҳиятини янада ошириш, билим ва кўникмаларини мустаҳкамлаш, тадбиркорлик давомида дуч келиш мумкин бўлган муаммоли вазиятларни бартараф этиш, тадбиркорлик соҳасидаги бугунги кун имкониятларидан тўлиқ ва тўғри фойдаланиш, ўз тадбиркорликларини бошлашлари учун билим ва кўникмаларни шакллантиришга қаратилган.

Қашқадарё вилоятининг бошқа туманларида ҳам «Аёллар дафтари»да рўйхатда турувчи, иш қидираётган ёки ишсиз сифатида рўйхатга олинган, тадбиркорлик фаолиятини бошлаш истагидаги хотин-қизлар ва тадбиркор аёллар фаол қатнашишмоқда.

ССП Матбуот хизмати