Ўзбекистон Савдо-саноат палатаси ва БМТТДнинг "Бизнесни интеграциялашган ҳолда қўллаб-қувватлаш" ташаббуси доирасида Самарқанд вилояти тадбиркорларига техник қурилмалар топширилди

Ушбу дастур доирасида танлов натижасида саралаб олинган тадбиркорлар учун якка тартибдаги бизнес муаммоларини ҳал қилиш мақсадида стратегик режалаштириш, маркетинг, операцион ва молиявий менежмент йўналишлари бўйича тўрт ҳафталик ўқув машғулотлари ва консалтинг хизматлари, шунингдек, Ўзбекистонлик тажрибали мутахассислар томонидан шахсий мураббийлик ташкил этилди.

Жорий йилнинг 23 август куни Самарқанд шаҳрида Самарқанд вилояти тадбиркорларига техник қурилмаларнинг биринчи қисмини топшириш маросими бўлиб ўтди. Тадбиркорлар интернет-дўконни ишга тушириш; спорт маҳсулотлари ва кийимларини ишлаб чиқариш ва тикиш; замонавий ва миллий аёллар кийимларини тикиш; қишлоқ жойларида тикувчилик маҳсулотларини ишлаб чиқариш; тайёр ва трикотаж маҳсулотларини ишлаб чиқариш каби бизнес лойиҳалар учун ускуналар олишди.

Тадбирда Самарқанд вилояти ҳокими ўринбосари, Савдо-саноат палатаси ҳудудий бошқармаси бошлиғи, ҳамкор ташкилотлар вакиллари ҳамда қурилма олувчи тадбиркорлар иштирок этишди.

Қурилма олувчилардан бири Бобур Шукуров қуйидагиларни таъкидлади:

“Бу ускуна бизга интернет-дўконни ишга тушириш лойиҳасини амалга ошириш имконини беради. Лойиҳамизнинг ўзига хос хусусияти сотувчи ва харидор ўртасидаги барча муносабатларни онлайн тартибига ўтказиш бўлади. Бу сотиш жараёнини соддалаштиради, харидорлар учун онлайн харидни фойдали ва қулай қилади, тадбиркорларнинг даромадларини оширади. Бу ташаббусни амалга ошириш натижасида биринчи йилда 5 та янги иш ўрни яратилади ва лойиҳа ривожланиб бориши билан янги ишчилар сони кўпаяди”.

Тадбиркорларга беғараз ёрдам сифатида умумий қиймати 454 млн сўмга тенг 96 дона тикув ва ИТ-қурилмалари топширилди. Ушбу тадбиркорлик ташаббусларини амалга ошириш натижасида Самарқанд вилоятида аёллар ва ёшлар учун 46та янги иш ўринлари яратилади ва 50 нафар аёллар ва ёшларга замонавий касб-ҳунарларни ўрганиши ҳамда тадбиркорлик қобилиятларини ривожлантириш имконияти яратилади.

Маълумот учун: "Бизнесни интеграциялашган ҳолда қўллаб-қувватлаш" дастури Ўзбекистон Савдо-саноат палатаси билан ҳамкорликда Россия Федерацияси ҳукумати томонидан молиялаштирилаётган Бандлик ва меҳнат муносабатлари вазирлиги ва БМТ Тараққиёт Дастурининг "Ўзбекистонда ёшлар бандлигига кўмаклашиш" қўшма лойиҳаси доирасида амалга оширилмоқда. Ташаббусни амалга ошириш учун қўшимча грант маблағлари Япония ҳукумати томонидан ажратилди.Ушбу ташаббус доирасида қишлоқ хўжалиги, новвойхона, тикувчилик, қурилиш, чиқиндиларни қайта ишлаш, ахборот технологиялари ва шу каби соҳаларда мамлакатимизнинг 5та вилоятларидан саралаб олинган 43 нафар тадбиркорларига (Самарқанд - 12, Жиззах - 7, Наманган -9, Фарғона - 9, Қашқадарё - 6) қурилмалар кўринишидаги грант маблағларини бериш режалаштирилган.

ССП Ахборот-хизмати