Тадбиркорнинг қонуний манфаатлари ҳимоя қилинди

Ўзбекистон Савдо-саноат палатасига унинг аъзоси «MAVLONO» МЧЖ мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

Палата аъзосининг мурожаати ўрганиб чиқилганда Янгийўл туман ҳокимининг қарори билан тадбиркорга туман захирасидаги 48,18 га. ер майдони узоқ муддатли ижара асосида ажратилган. Бироқ, кейинчалик туман ҳокимининг янги қарори билан тадбиркорга ажратилган ер майдони асоссиз равишда туман захирасига қайтариб олинган.

Янгийўл туман ҳокимининг тадбиркорга ажратилган ер майдонини туман захирасига қайтариб олиш тўғрисидаги қарорининг тегишли бандини бекор қилиш ва ҳокимлик зиммасига олиб қўйилган ер майдонини қайтариш мажбуриятини юклаш юзасидан Савдо-саноат палатаси томонидан Палата аъзоси манфаатида Янгийўл шаҳар маъмурий судига ариза киритилган.

Янгийўл шаҳар маъмурий судининг ҳал қилув қарори билан Палата томонидан киритилган ариза тўлиқ қаноатлантирилган. Тошкент вилоят маъмурий суди апелляция инстанциясининг қарори билан биринчи инстанция суди ҳал қилув қарори ўз қучида қолдирилган.

Мазкур суд қарорларини бекор қилиш бўйича жавобгар томонидан Олий судга киритилган кассация шикояти Олий суднинг маъмурий ишлар бўйича судлов ҳайъатининг қарори билан қаноатлантирилиб, Савдо-саноат палатаси томонидан Палата аъзоси манфаатида киритилган аризани қаноатлантириш рад этилган.

Бироқ, Олий суднинг маъмурий ишлар бўйича судлов ҳайъатининг қарорини қайта кассация тартибида кўриб чиқиш юзасидан киритилган илтимоснома қаноатлантирилиб, Олий суднинг маъмурий ишлар бўйича судлов ҳайъатининг янги қарори билан Савдо-саноат палатасининг даъво талаблари қаноатлантирилган ва шу тариқа, Палата аъзосининг ҳуқуқ ва қонуний манфаатлари ҳимоя қилинди.

ССП Ахборот-хизмати