Tadbirkorning qonuniy manfaatlari himoya qilindi

O‘zbekiston Savdo-sanoat palatasiga uning a'zosi «MAVLONO» MChJ murojaat qilib, huquq va qonuniy manfaatlarini himoya qilishda amaliy yordam so‘ragan.

Palata a'zosining murojaati o‘rganib chiqilganda Yangiyo‘l tuman hokimining qarori bilan tadbirkorga tuman zaxirasidagi 48,18 ga. yer maydoni uzoq muddatli ijara asosida ajratilgan. Biroq, keyinchalik tuman hokimining yangi qarori bilan tadbirkorga ajratilgan yer maydoni asossiz ravishda tuman zaxirasiga qaytarib olingan.

Yangiyo‘l tuman hokimining tadbirkorga ajratilgan yer maydonini tuman zaxirasiga qaytarib olish to‘g‘risidagi qarorining tegishli bandini bekor qilish va hokimlik zimmasiga olib qo‘yilgan yer maydonini qaytarish majburiyatini yuklash yuzasidan Savdo-sanoat palatasi tomonidan Palata a'zosi manfaatida Yangiyo‘l shahar ma'muriy sudiga ariza kiritilgan.

Yangiyo‘l shahar ma'muriy sudining hal qiluv qarori bilan Palata tomonidan kiritilgan ariza to‘liq qanoatlantirilgan. Toshkent viloyat ma'muriy sudi apellyasiya instansiyasining qarori bilan birinchi instansiya sudi hal qiluv qarori o‘z quchida qoldirilgan.

Mazkur sud qarorlarini bekor qilish bo‘yicha javobgar tomonidan Oliy sudga kiritilgan kassasiya shikoyati Oliy sudning ma'muriy ishlar bo‘yicha sudlov hay'atining qarori bilan qanoatlantirilib, Savdo-sanoat palatasi tomonidan Palata a'zosi manfaatida kiritilgan arizani qanoatlantirish rad etilgan.

Biroq, Oliy sudning ma'muriy ishlar bo‘yicha sudlov hay'atining qarorini qayta kassasiya tartibida ko‘rib chiqish yuzasidan kiritilgan iltimosnoma qanoatlantirilib, Oliy sudning ma'muriy ishlar bo‘yicha sudlov hay'atining yangi qarori bilan Savdo-sanoat palatasining da'vo talablari qanoatlantirilgan va shu tariqa, Palata a'zosining huquq va qonuniy manfaatlari himoya qilindi.

SSP Axborot-xizmati