Ўзбекистон Савдо-саноат палатаси ва БМТТДнинг "Бизнесни интеграциялашган ҳолда қўллаб-қувватлаш" ташаббуси доирасида Наманган вилояти тадбиркорларига техник қурилмалар топширилди

COVID-19 пандемиясининг салбий оқибатларини юмшатиш мақсадида Ўзбекистон Савдо-саноат палатаси ва БМТТД томонидан кичик бизнес субъектларига рақобатбардош бўлишга ёрдам бериш, самарадорликни ошириш ва уларнинг ўсишига кўмаклашиш орқали бизнес кўникмаларини ўргатиш, маслаҳат ёрдами ва техник қурилмалари кўринишида техник ёрдам кўрсатишни ичига қамраб олган "Бизнесни интеграциялашган ҳолда қўллаб-қувватлаш" дастури ишга туширилди.

Ушбу дастур доирасида танлов натижасида саралаб олинган тадбиркорлар учун якка тартибдаги бизнес муаммоларини ҳал қилиш мақсадида стратегик режалаштириш, маркетинг, оператсион ва молиявий менежмент йўналишлари бўйича тўрт ҳафталик ўқув машғулотлари ва консалтинг хизматлари, шунингдек, Ўзбекистонлик тажрибали мутахассислар томонидан шахсий мураббийлик ташкил этилди.

Жорий йилнинг 1 апрел куни Наманган шаҳрида Наманган вилояти тадбиркорларига техник қурилмаларнинг иккинчи қисмини топшириш маросими бўлиб ўтди. Тадбирда Савдо-саноат палатаси бўлими бошлиғи Б. Холбоев, Савдо-саноат палатаси ҳудудий бошқармаси бошлиғи Қ.Жамалов, БМТТД Инклюзив бандлик бўйича дастур менежери Б.Беков, ҳамкор ташкилотлар вакиллари ҳамда қурилма олувчи тадбиркорлар иштирок этишди.

Қурилма олувчилардан бири Рислиқхон Жўраева қуйидагиларни таъкидлади:

“2009 йилдан бери фаолият юрғизаман, кам таъминланган, ижтимоий ҳимояга муҳтож оилалардаги аёлларни иш билан таъминлайман. Шу бугунга қадар 500та шогирд чиқардим. БМТТД лойиҳаси доирасида умумий қиймати 91 миллион сўмга тенг жами 19 дона замонавий текстил ускуналарни олдим. Бунинг натижасида қўшимча равишда 17 нафар аёлни иш билан таъминладим. Ички бозор ва экспортга ҳаммом учун ҳалатлар ва сочиқларни ишлаб чиқарамиз. Кўмак учун дастур ташкилотчиларига миннатдорчилик билдираман”.

Тадбиркорларга беғараз ёрдам сифатида умумий қиймати 582,8 млн сўмга тенг 61 дона тикув ва ИТ-қурилмалари топширилди. Ушбу тадбиркорлик ташаббусларини амалга ошириш натижасида Наманган вилоятида жами 43та янги иш ўринлари яратилди (улардан 24таси аёллар) ва 146 нафар ёшларга (улардан 118таси аёллар) замонавий касб-ҳунарларни ўрганиши ҳамда тадбиркорлик қобилиятларини ривожлантириш имконияти яратилади.

Маълумот учун:

"Бизнесни интеграциялашган ҳолда қўллаб-қувватлаш" дастури Ўзбекистон Савдо-саноат палатаси билан ҳамкорликда Бандлик ва меҳнат муносабатлари вазирлиги ва БМТ Тараққиёт Дастурининг "Ўзбекистонда ёшлар бандлигига кўмаклашиш" қўшма лойиҳаси доирасида амалга оширилмоқда. Ташаббусни амалга ошириш учун қўшимча грант маблағлари Япония ҳукумати томонидан ажратилди.

Ушбу ташаббус доирасида қишлоқ хўжалиги, новвойхона, тикувчилик, қурилиш, чиқиндиларни қайта ишлаш, ахборот технологиялари ва шу каби соҳаларда мамлакатимизнинг 5та вилоятларидан саралаб олинган 43 нафар тадбиркорларига (Самарқанд - 12, Жиззах - 7, Наманган -9, Фарг’она - 9, Қашқадарё - 6) умумий қиймати 4 092 919 455 сўмлик жами 478 қурилмалар кўринишидаги грант маблағлари топширилди.

Ушбу тадбиркорлик ташаббусларини амалга ошириш натижасида республика доирасида 398та янги иш ўринлари яратилди (улардан 267таси аёллар) ва 715 ёшларга (улардан 526таси аёллар) замонавий касб-ҳунарларни ўрганиши ҳамда тадбиркорлик қобилиятларини ривожлантириш имконияти яратилади.