O’zbekiston Savdo-sanoat palatasi va BMTTDning "Biznesni integratsiyalashgan holda qo'llab-quvvatlash" tashabbusi doirasida Namangan viloyati tadbirkorlariga texnik qurilmalar topshirildi

COVID-19 pandemiyasining salbiy oqibatlarini yumshatish maqsadida O'zbekiston Savdo-sanoat palatasi va BMTTD tomonidan kichik biznes sub'ektlariga raqobatbardosh bo'lishga yordam berish, samaradorlikni oshirish va ularning o'sishiga ko'maklashish orqali biznes ko'nikmalarini o'rgatish, maslahat yordami va texnik qurilmalari ko'rinishida texnik yordam ko'rsatishni ichiga qamrab olgan "Biznesni integratsiyalashgan holda qo'llab-quvvatlash" dasturi ishga tushirildi.

Ushbu dastur doirasida tanlov natijasida saralab olingan tadbirkorlar uchun yakka tartibdagi biznes muammolarini hal qilish maqsadida strategik rejalashtirish, marketing, operatsion va moliyaviy menejment yo’nalishlari bo’yicha to'rt haftalik o'quv mashg’ulotlari va konsalting xizmatlari, shuningdek, O'zbekistonlik tajribali mutaxassislar tomonidan shaxsiy murabbiylik tashkil etildi.

Joriy yilning 1 aprel kuni Namangan shahrida Namangan viloyati tadbirkorlariga texnik qurilmalarning ikkinchi qismini topshirish marosimi bo’lib o’tdi. Tadbirda Savdo-sanoat palatasi bo’limi boshlig’i B. Xolboyev, Savdo-sanoat palatasi hududiy boshqarmasi boshlig’i Q.Jamalov, BMTTD Inklyiziv bandlik bo’yicha dastur menejeri B.Bekov, hamkor tashkilotlar vakillari hamda qurilma oluvchi tadbirkorlar ishtirok etishdi.

Qurilma oluvchilardan biri Risliqxon Jo’rayeva quyidagilarni ta'kidladi:

“2009 yildan beri faoliyat yurg’izaman, kam ta’minlangan, ijtimoiy himoyaga muhtoj oilalardagi ayollarni ish bilan ta’minlayman. Shu bugunga qadar 500ta shogird chiqardim. BMTTD loyihasi doirasida umumiy qiymati 91 million so’mga teng jami 19 dona zamonaviy tekstil uskunalarni oldim. Buning natijasida qo’shimcha ravishda 17 nafar ayolni ish bilan ta’minladim. Ichki bozor va eksportga hammom uchun halatlar va sochiqlarni ishlab chiqaramiz. Ko’mak uchun dastur tashkilotchilariga minnatdorchilik bildiraman”.

Tadbirkorlarga beg’araz yordam sifatida umumiy qiymati 582,8 mln so’mga teng 61 dona tikuv va IT-qurilmalari topshirildi. Ushbu tadbirkorlik tashabbuslarini amalga oshirish natijasida Namangan viloyatida jami 43ta yangi ish o'rinlari yaratildi (ulardan 24tasi ayollar) va 146 nafar yoshlarga (ulardan 118tasi ayollar) zamonaviy kasb-hunarlarni o'rganishi hamda tadbirkorlik qobiliyatlarini rivojlantirish imkoniyati yaratiladi.

Ma’lumot uchun:

"Biznesni integratsiyalashgan holda qo'llab-quvvatlash" dasturi O'zbekiston Savdo-sanoat palatasi bilan hamkorlikda Bandlik va mehnat munosabatlari vazirligi va BMT Taraqqiyot Dasturining "O'zbekistonda yoshlar bandligiga ko'maklashish" qo'shma loyihasi doirasida amalga oshirilmoqda. Tashabbusni amalga oshirish uchun qo'shimcha grant mablag'lari Yaponiya hukumati tomonidan ajratildi.

Ushbu tashabbus doirasida qishloq xo'jaligi, novvoyxona, tikuvchilik, qurilish, chiqindilarni qayta ishlash, axborot texnologiyalari va shu kabi sohalarda mamlakatimizning 5ta viloyatlaridan saralab olingan 43 nafar tadbirkorlariga (Samarqand - 12, Jizzax - 7, Namangan -9, Farg’ona - 9, Qashqadaryo - 6) umumiy qiymati 4 092 919 455 so’mlik jami 478 qurilmalar ko'rinishidagi grant mablag'lari topshirildi.

Ushbu tadbirkorlik tashabbuslarini amalga oshirish natijasida respublika doirasida 398ta yangi ish o'rinlari yaratildi (ulardan 267tasi ayollar) va 715 yoshlarga (ulardan 526tasi ayollar) zamonaviy kasb-hunarlarni o'rganishi hamda tadbirkorlik qobiliyatlarini rivojlantirish imkoniyati yaratiladi.