Жамоатчилик экспертизаси ўтказилган яна бир норматив-ҳуқуқий ҳужжат лойиҳаси хусусида

“Ўзбекистон Республикаси Савдо-саноат палатаси тўғрисида”ги Қонуннинг 22-моддасида белгиланган Савдо-саноат палатасининг қонун ижодкорлиги соҳасидаги ваколатларини амалга оширган ҳолда, Палата томонидан қонунчилик ҳужжатлари лойиҳалари юзасидан Жамоатчилик экспертизалари ўтказилиб, уларнинг тадбиркорлик фаолиятига таъсирини баҳолаган ҳолда, салбий ҳамда ижобий характердаги Хулосалар бериб келинмоқда.

Хусусан, жорий йилнинг ўтган даври мобайнида 267 та норматив-ҳуқуқий ҳужжат лойиҳаси Палата томонидан кўриб чиқилиб, Жамоатчилик экспертизаси хулосалари берилди.

Мисол учун, Ўзбекистон Республикаси Гидрометеорология хизмати маркази томонидан ишлаб чиқилган Ўзбекистон Республикаси Вазирлар Маҳкамасининг “Гидрометеорология фаолиятини амалга оширувчи юридик шахслар фаолиятини ташкил этиш ва маълумот алмашиниш регламентини тасдиқлаш тўғрисида”ги Қарори (ID-57707) лойиҳаси  жамоатчилик экспертизасидан  ўтказилиб, у юзасидан қуйидагича Жамоатчилик экспертизаси хулосаси берилди:

Лойиҳа мазмунига кўра, гидрометеорология фаолиятини амалга оширувчи юридик шахслар фаолиятини ташкил этиш ва маълумот алмашиниш тартибини тасдиқлаш назарда тутилган.

Бунда, гидрометеорология фаолиятини амалга оширувчи юридик шахсларни ташкил этиш, улар фаолиятига қўйиладиган талаблар ҳамда уни мониторинг қилиш каби нормалар белгиланган.

Умуман олганда, лойиҳа 1-иловасида гидрометеорология фаолиятини амалга оширишда юрдик шахслар учун рухсат бериш тартиб-таомиллари назарда тутилган.

Унда келтирилган QR-кодли (матрик штрихли код) шартнома эса мазмунан рухсат берувчи ҳужжат сифатида келтирилган.

Бироқ, “Лицензиялаш, рухсат бериш ва хабардор қилиш тартиб-таомиллари тўғрисида”ги Қонунга кўра, ушбу фаолият лицензиялаш, рухсат бериш ва хабардор қилиш тартиб-таомиллари тадбиқ этиладиган фаолият тури эмас.

Қолаверса, “Гидрометеорология фаолияти тўғрисидаги”ги Қонуннинг 16-моддасига кўра, гидрометеорология фаолиятини амалга оширувчи юридик шахслар гидрометеорология фаолияти тўғрисидаги қонунчиликка мувофиқ махсус ваколатли давлат органи билан шартнома асосида ахборот алмашиши мумкин, деб белгиланган.

Яъники, бунда шартнома асосида ахборот алмашиш юридик шахслар учун гидрометеорология фаолиятини амалга оширишнинг ягона шакли, мажбурий шарти эмас, балки юридик шахснинг ихтиёрийлик асосидаги ҳуқуқи сифатида назарда тутилган.

Ўзбекистон Республикаси Президентининг 2020 йил 17 ноябрдаги ПҚ–4896-сонли Қарорида эса, гидрометеорология фаолиятини амалга оширувчи юридик шахслар фаолиятига рухсат бериш ва маълумот алмашиниш тартибини ишлаб чиқиш топширилган.

Юқоридагиларни инобатга олган ҳолда, лойиҳада маълумот алмашиниш тартибини белгилаш ва буни икки томонлама тенг ҳуқуқлилик асосидаги шартнома асосида амалга оширилишини назарда тутиш зарур.