Ўзбекистон-Белоруссия бизнес-форуми бўлиб ўтди

2022-йилнинг 25 апрель куни “UzEkspomarkaz” кўргазмалар мажмуасида Ўзбекистон-Белоруссия бизнес-форуми ва икки давлат ишбилармон доиралари ўртасида B2B форматидаги музокаралар бўлиб ўтди.

Тадбирда  Ўзбекистон томонидан Савдо-саноат палатаси раиси Д.Ваҳабов Туризм ва маданий мерос вазирининг биринчи ўринбосари У.Аъзамов, Беларусь томонидан Белоруссия Савдо-саноат палатаси раиси  М.Мятликов, «Керамин» очиқ акциядорлик жамияти директори ўринбосари Е, Беляцкая, «Сморгонские молочные продукты» ОАЖ директори И. Воронище, «Светоприбор» УК директори ўринбосари А.Конойко ва шу каби кўплаб йирик акциядорлик жамияти ва корхоналар вакиллари иштирок этди.

Тадбирда Ўзбекистон ишбилармон доираларининг 100 дан ортиқ вакиллари ва Беларусь Республикасининг 50 га яқин ишбилармонлари иштирок этди. Ўзбекистон томонидан ҳам қатор саноат бирлашмалари вакиллари иштирок этди.

Таъкидлаш жоизки, Беларусь Республикаси делегацияси таркибидан  Белоруссиянинг етакчи корхоналари вакиллари ўрин олган бўлиб, асосий эътибор Ўзбекистон корхоналари билан узоқ муддатли ва самарали ҳамкорлик қилишга қаратилди.

Тадбирдан кўзланган асосий мақсад икки томонлама савдо-иқтисодий ва сармоявий ҳамкорликнинг бугунги ҳолати ва истиқболларини муҳокама қилиш, шунингдек, тадбиркорларга қўшимча имкониятлар яратишда икки давлат ўртасидаги ҳамкорликни мустаҳкамлашдан иборат.

Томонлар Беларусь ва Ўзбек тадбиркорлари ва инвесторларини амалий ҳамкорликка жалб этиш учун энг қулай шарт-шароитларни яратиш, шунингдек истиқболли тармоқларда ўзаро манфаатли лойиҳаларни амалга ошириш, ўзаро ҳамкорлик кўламини ошириш боарсидаги ишларни фаоллаштириш тарафдори эканини таъкидладилар.

Тадбирда Давлатимиз раҳбари ва ҳукуматимиз томонидан мамлакатимиз иқтисодиётида хусусий секторнинг ролини оширишга катта эътибор қаратилаётгани, шу муносабат билан инвестицияларни ривожлантириш бўйича амалий чора-тадбирлар фаол ишлаб чиқилиб, ҳаётга татбиқ этилаётгани бир неча бор таъкидланди. Шунингдек ишбилармонлик муҳитини яхшилаш, тадбиркорлик субектларига солиқ юкини камайтириш, хусусий мулк ва хорижий капитални ҳуқуқий ҳимоя қилиш механизмларини кучайтириш, шунингдек, мамлакатимизнинг ҳар бир вилоят, туман ва шаҳарлари негизида янги фойдаланилмаган иқтисодий захираларни аниқлаш, улардан оқилона фойдаланиш масалалари ҳам қайд этилди.

Тадбир давомида икки мамлакат тадбиркорлари ўртасида ҳамкорлик алоқаларини ўрнатишдаги энг устувор йўналишлар санаб ўтилди. Улар орасидан озиқ-овқат, тўқимачилик, электротехника, фармацевтика, биотиббиёт ҳамда IT ва бошқа соҳалар ўрин олди.

Тегишли тармоқ бирлашмалари раҳбарларининг тақдимот тарзидаги маърузалари давомида ҳар бир тармоқнинг инвестицион салоҳиятини атрофлича очиб берилди, шунингдек, хорижий инвестицияларни жалб этишни қўллаб-қувватлаш ва рағбатлантиришнинг мавжуд механизмлари ҳамда хорижий капитал иштирокидаги лойиҳаларни амалга ошириш ҳақида сўз юритилди.

Қайд этиш лозимки мамлакатимизнинг Беларусь Республикаси билан савдо-иқтисодий алоқалари ўтган давр мобйнида жадар ривожлантирилиб келинмоқда. 2017 йилдан бошлаб икки мамлакат ишбилармон вакиллари ўртасида умумий ҳисобда 25 дан ортиқ ташрифлар амалга оширилган бўлиб, 2018-2019 йилларда ташкил этилган олий даражадаги ташрифлар доирасида ҳудудий форумлари ва миллий кўргазма тадбирлари ҳам ўтказилган. Ўтказилган тадбирлар ва мулоқотлар натижасида бугунги кунга келиб Белоруссия иштирокидаги 107 корхона Ўзбекистон ҳудудида фаолият юритаётган бўлиб уларнинг 61 та қўшма корхона, 46 таси эса 100% ҳорижий капитал иштирокидаги тадбиркорлик субъектлари ҳисобланади.

Бугунги ташкил этилган тадбир доирасида ҳам B2B форматидаги учрашувлар ўтказилиб, унда тадбиркорлар ҳамкорларга ўз маҳсулот ва хизматларини намойиш этиб, экспорт салоҳияти ва ҳамкорликнинг устувор йўналишлари юзасидан фикр алмашдилар.