Палата томонидан тадбиркорлик субъектларининг хуқуқий химоясини таъминлаш, бизнес сохасида коррупция ва бошқа хуқуқбузарликларга қарши курашиш ҳамда ҳакамлик судларида ишлар кўрилиши аҳволи муҳокамаси

Жорий йилнинг 27 май куни Палата Раисининг биринчи ўринбосари И.Жасимов бошчилигида Палатанинг ҳудудий бошқарма бошлиқлари ўринбосарлари, юридик хизмати ходимлари ҳамда ҳакамлик судлари раҳбарлари иштирокида Палата аъзолари манфаатида судларга даъво аризалари киритилиши ҳолати ҳамда бизнесда коррупцияга қарши курашиш ва тадбиркорлар ўртасида “Коррупцияга қарши курашиш” Хартияси аъзолигига жалб қилиш, шунингдек, Палата ҳузуридаги ҳакамлик судларининг фаолиятига бағишланган видеоконференцалоқа шаклида селектор бўлиб ўтди.

Тадбирда, авваламбор, таъкидлаб ўтилдики, тадбиркорларнинг хуқуқ ва қонуний манфаатларини ҳимоя қилиш, уларнинг хуқуқий онгини ошириш ва бизнес сохасида хуқуқбузарлик профилактикаси борасида Палата ва унинг қуйи тузилмалари томонидан тизимли равишда маълум ишлар амалга оширилган.

Хусусан, тадбирда Палатанинг энг муҳим вазифаларидан бири унга аъзо бўлган тадбиркорларнинг ҳуқуқ ва қонуний манфаатларини суд орқали ҳимоя қилишнинг сифати ва ишончлилигини ошириш эканлиги таъкидланди.

Биргина, 2022 йилнинг биринчи чорагида Палата аъзолари манфаатида судларга 113 мингдан ортиқ, умумий суммаси 12,6 трлн. сўмга яқин даъво аризалар киритилган бўлиб, ушбу кўрсатгич 2021 йилнинг мос даврига нисбатан 2 баробарга кўп эканлиги тўғрисида ахборот берилди.

Тадбир давомида Палата томонидан Палата аъзолари манфаатида даъво аризалар, шикоятлар ва аризалар киритиш борасидаги камчиликларга йўл қўймасликка, бу хуқуқий воситасининг самарасини ҳамда даъво аризалар сифатини ва қаноатлантириш даражасини янада ошириш лозимлигига эътибор қаратилиб, бу борада тегишли чоралар белгилаб олинди.

Бундан ташқари, Палата томонидан тадбиркорлар ўртасида ҳуқуқбузарликлар профилактикаси, бизнесда коррупцияга қарши курашиш ҳамда тадбиркорлик субъектларини “Коррупцияга қарши курашиш” Хартияси аъзолигига жалб қилиш борасида олиб борилаётган ишлар ҳам муҳокама қилинди.

Жумладан, жорий йилнинг биринчи чораги давомида 111 та тадбиркорлик субъектларига “Коррупцияга қарши курашиш” Хартияси аъзолигига қўшилганлиги хақида сертификатлар берилганлиги маълум қилинди.

Шу билан бирга, тадбиркорлар ўртасида Хартияни ва унинг бизнес сохасида коррупцияга қарши курашишдаги аҳамиятини кенг тарғиб қилиш орқали тадбиркорларни унга қўшилишга даъват этиш ишларини жадаллаштириш талаб этилди.

Йиғилиш давомида Палата ва унинг ҳудудий бошқармалари ҳузуридаги ҳакамлик судлари томонидан амалга оширилган ишларга ҳам тўхталиб ўтилди.

Жумладан, 2022 йилнинг биринчи чорагида ҳакамлик судлари томонидан 522 та ишлар кўрилган бўлиб, даъво суммаси 4,1 трлн сўмни ташкил қилган. Бу эса, ўтган йилнинг мос даври билан таққосланганда, келиб тушган даъво аризалар сони 724 тага камайганлиги маълум қилинди.

Ҳакамлик судларининг фаолиятини жонлантириш ҳамда уларнинг нуфузини янада ошириш мақсадида, судлар фаолиятини тадбиркорлар ўртасида кенг тарғиб қилиш ишларини доимий равишда олиб бориш борасида аниқ вазифалар қўйилди.

Шу билан бирга, бу борадаги ишларнинг самарадорлигини янада ошириш, тадбиркорларга сифатли ва ишончли юридик хизмат кўрсатиш мақсадида, ҳудудий бошқармаларнинг юридик йўналишдаги масъул ходимлари учун доимий равишда семинарлар ташкил этиш тўғрисида келишилди.