Палата томонидан навбатдаги давра суҳбати ўтказилди

Ўзбекистон Савдо-саноат палатаси томонидан тадбиркорлик субъектларининг соҳалар кесимида муаоммалари ва таклифларини аниқлаш ҳамда уларнинг ечимларини топишга қаратилган давра суҳбатларини ўтказиш амалиёти йўлга қўйилган.

Жорий йилнинг 16 июль куни “Nest One” биносида, ушбу анъанани давом эттирган ҳолда Ўзбекистон Савдо-саноат палатаси томонидан аҳолини арзон ва сифатли дори воситалари билан таъминлаш ҳамда фармацевтика соҳасида фаолият юритаётган тадбиркорлик субъектларини ривожлантириш ва улар фаолиятида дуч келинаётган муаммолар ечимига бағишланган давра суҳбати ўтказилди.

Давлат раҳбари томонидан жорий йилнинг 12 апрель куни фармацевтика тармоғини ривожлантириш масалалари бўйича ўтказган йиғилишда мамлакатимизда йилига 1 миллиард 600 миллион долларлик фармацевтика маҳсулотлари истеъмол қилиниши, шундан катта қисми – қарийб 1 миллиард 200 миллион долларлик маҳсулотлар импорт қилинаётганлиги таъкидлаб ўтилган.

Хусусан, ҳудудлар кесимида олганда, маҳаллийлаштириш даражаси мутлақо қониқарсиз. Қашқадарё, Сурхондарё, Хоразм, Бухоро ва Фарғона вилоятларида истеъмол қилинадиган дорининг атиги 2-5 фоизи маҳаллий ишлаб чиқарувчилар ҳиссасига тўғри келади.

Шу боис, дори воситаларига талабни ўрганиб, уларни маҳаллийлаштириш чора-тадбирлари белгиланган, хусусан, жорий йилнинг ўзида 80 миллион долларлик 34 та лойиҳа режалаштирилган.

Тадбирни Ўзбекистон Савдо-саноат палатаси раиси Д.Вахабов очиб берди ва фармацевтика соҳадаги бугунги ҳолат ҳамда ушбу йўналишдаги тадбиркорларнинг соҳадаги муаммоларини аниқлаш, таклифларини ўрганиб чиқишда янада фаол бўлишга чақирди.

Мазкур давра суҳбатида Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил Д.Касимов, Давлат солиқ қўмитаси раисининг биринчи ўринбосари М.Мирзаев, Инвестициялар ва ташқи савдо вазирининг биринчи ўринбосари А.Воитов, Давлат божхона қўмитаси раисининг биринчи ўринбосари Н.Мусамухамедов, Фармацевтика тармоғини ривожлантириш агентлиги директори С.Кариев, "Dori-Darmon" АЖ бошқарув раиси У.Салихбаева ҳамда юртимизда дори воситалари ва тиббиёт буюмлари ишлаб чиқариш, шунингдек улгуржи савдо фаолияти билан 150 нафар шуғулланувчи тадбиркорлик субъектлари иштирок этишди.

Шу билан бирга, Савдо-саноат палатасининг 14 та худудий бошкармаси биноларидан онлайн тарзда ZOOM платформаси орқали фармацевтика соҳасида фаолият юритиб келаётган 140 нафар нуфузли тадбиркорлар иштирок этишди.

Учрашувнинг муҳим мақсадларидан бири – тадбиркорларга фармацевтикага оид тизимли муаммолар ва конструктив ечимларни очиқ муҳокама қилиш учун майдон яратишдан иборат.

Конструктив рухда, қизғин савол-жавоб кўринишида ўтган давра суҳбатидан сўнг, дори воситаларини маркировкалаш тизимини жорий этиш учун зарур бўлган ахборотлар бериб ўтилди.

Тадбир давомида муҳокама қилинган йўналишлар бўйича тадбиркорлик субъектларининг таклифлари умумлаштириш, таҳлил қилиш ва юқори ташкилотларга тақдим қилиш учун йиғиб олинди.

         Савдо-саноат палатаси Матбуот хизмати