Palata tomonidan navbatdagi davra suhbati oʼtkazildi

Oʼzbekiston Savdo-sanoat palatasi tomonidan tadbirkorlik subʼektlarining sohalar kesimida muaommalari va takliflarini aniqlash hamda ularning yechimlarini topishga qaratilgan davra suhbatlarini oʼtkazish amaliyoti yoʼlga qoʼyilgan.

Joriy yilning 16 iyul kuni “Nest One” binosida, ushbu anʼanani davom ettirgan holda Oʼzbekiston Savdo-sanoat palatasi tomonidan aholini arzon va sifatli dori vositalari bilan taʼminlash hamda farmatsevtika sohasida faoliyat yuritayotgan tadbirkorlik subʼektlarini rivojlantirish va ular faoliyatida duch kelinayotgan muammolar yechimiga bagʼishlangan davra suhbati oʼtkazildi.

Davlat rahbari tomonidan joriy yilning 12 aprel kuni farmatsevtika tarmogʼini rivojlantirish masalalari boʼyicha oʼtkazgan yigʼilishda mamlakatimizda yiliga 1 milliard 600 million dollarlik farmatsevtika mahsulotlari isteʼmol qilinishi, shundan katta qismi – qariyb 1 milliard 200 million dollarlik mahsulotlar import qilinayotganligi taʼkidlab oʼtilgan.

Xususan, hududlar kesimida olganda, mahalliylashtirish darajasi mutlaqo qoniqarsiz. Qashqadaryo, Surxondaryo, Xorazm, Buxoro va Fargʼona viloyatlarida isteʼmol qilinadigan dorining atigi 2-5 foizi mahalliy ishlab chiqaruvchilar hissasiga toʼgʼri keladi.

Shu bois, dori vositalariga talabni oʼrganib, ularni mahalliylashtirish chora-tadbirlari belgilangan, xususan, joriy yilning oʼzida 80 million dollarlik 34 ta loyiha rejalashtirilgan.

Tadbirni Oʼzbekiston Savdo-sanoat palatasi raisi D.Vaxabov ochib berdi va farmatsevtika sohadagi bugungi holat hamda ushbu yoʼnalishdagi tadbirkorlarning sohadagi muammolarini aniqlash, takliflarini oʼrganib chiqishda yanada faol boʼlishga chaqirdi.

Mazkur davra suhbatida Oʼzbekiston Respublikasi Prezidenti huzuridagi Tadbirkorlik subʼektlarining huquqlari va qonuniy manfaatlarini himoya qilish boʼyicha vakil D.Kasimov, Davlat soliq qoʼmitasi raisining birinchi oʼrinbosari M.Mirzaev, Investitsiyalar va tashqi savdo vazirining birinchi oʼrinbosari А.Voitov, Davlat bojxona qoʼmitasi raisining birinchi oʼrinbosari N.Musamuxamedov, Farmatsevtika tarmogʼini rivojlantirish agentligi direktori S.Kariev, "Dori-Darmon" АJ boshqaruv raisi U.Sаlixbаeva hamda yurtimizda dori vositalari va tibbiyot buyumlari ishlab chiqarish, shuningdek ulgurji savdo faoliyati bilan 150 nafar shugʼullanuvchi tadbirkorlik subʼektlari ishtirok etishdi.

Shu bilan birga, Savdo-sanoat palatasining 14 ta xududiy boshkarmasi binolaridan onlayn tarzda ZOOM platformasi orqali farmatsevtika sohasida faoliyat yuritib kelayotgan 140 nafar nufuzli tadbirkorlar ishtirok etishdi.

Uchrashuvning muhim maqsadlaridan biri – tadbirkorlarga farmatsevtikaga oid tizimli muammolar va konstruktiv yechimlarni ochiq muhokama qilish uchun maydon yaratishdan iborat.

Konstruktiv ruxda, qizgʼin savol-javob koʼrinishida oʼtgan davra suhbatidan soʼng, dori vositalarini markirovkalash tizimini joriy etish uchun zarur boʼlgan axborotlar berib oʼtildi.

Tadbir davomida muhokama qilingan yoʼnalishlar boʼyicha tadbirkorlik subʼektlarining takliflari umumlashtirish, tahlil qilish va yuqori tashkilotlarga taqdim qilish uchun yigʼib olindi.

         Savdo-sanoat palatasi Matbuot xizmati