“Тадбиркорлик кодекси” – тадбиркор манфаатлари учун” мавзусида халқаро конференция

Жорий йилнинг 7 сентябр куни “International Hotel Tashkent” меҳмонхонасида онлайн ва оффлайн режимда “Тадбиркорлик кодекси” – тадбиркор манфаатлари учун” мавзусида халқаро конференция бўлиб ўтди.

Конференцияда Савдо-саноат палатаси раисининг биринчи ўринбосари Ислам Жасимов, шунингдек, Олий Мажлис палаталари, Президент Администрaцияси, Вазирлар Маҳкамаси, вазирлик ва идоралар, Бизнес-омбудсман, 20 дан ортиқ халқаро ва миллий экспертлар, илмий ҳамжамият, 100 дан ортиқ ўрта ва йирик бизнес вакиллари иштирок этишди.

Ушбу тадбирдан кўзланган асосий мақсад – Кодекс лойиҳаси юзасидан таклиф ва мулоҳазаларни муҳокама қилиш, лойиҳани такомиллаштириш бўйича фикрлар алмашишдан иборат.

Тадбиркорлик кодекси лойиҳасини ишлаб чиқишга 3 йилга яқин вақт сарфланди. Лойиҳани ишлаб чиқишда нафақат миллий экспертлар, балки халқаро экспертлар ҳам жалб қилинди. Асосийси, лойиҳа охирги 4-5 ойдан буён жамоатчилик муҳокамасидан ўтказилмоқда. 

Муҳокамалар натижасида 1,5 мингга яқин таклиф тушган ҳамда лойиҳада коррупциявий омилларнинг мавжудлиги, гендер тенгликка таъсири ва бошқа масалалар бўйича ўтказилган сўровномаларда 1,2 мингдан ортиқ фуқаро иштирок этган. 

Халқаро конференциянинг сессияларида халқаро ташкилотларнинг хорижий экспертлари, давлат органлари ва ташкилотларининг раҳбарлари ҳамда тадбиркорларнинг давлат ва тадбиркорлик субъектлари ўртасидаги муносабатларнинг ҳуқуқий асослари, тадбиркорликни давлат томонидан тартибга солишнинг шакл ва воситалари ҳақидаги маърузалари ва таклифлари тингланди. 

ССП Матбуот хизмати