Бизнес жараёнларида қоғоз шаклдаги ҳисоботларни соддалаштириш ва электрон ҳужжатлар айланиш тизимини такомиллаштириш масалалари муҳокама этилди

Ўзбекистон Савдо-саноат палатаси томонидан 2022 йил 17 октябрь куни онлайн тарзда маҳаллий тадбиркорлик субъектлари иштирокида Ўзбекистон Республикаси Президентининг 2022 йил 30 августдаги “Ўзбекистон Республикаси Президентининг тадбиркорлар билан 2022 йилдаги “очиқ мулоқоти”да белгиланган вазифаларни амалга ошириш чора-тадбирлари тўғрисида”ги ПҚ-364-сонли қарори билан тасдиқланган “Йўл харитаси”нинг 21-бандига мувофиқ тадбиркорлар учун бизнес жараёнларида қоғозбозликни қисқартиришга оид масалалар муҳокама этилди.

Тадбирда “HAVAS FOOD”  МЧЖ (Havas), “ANGLESEY FOOD" ҚК МЧЖ (Korzinka), “DARVOZA SAVDO” МЧЖ (Makro), “TOSHKENT METALLURGIYA ZAVODI”  ҚК МЧЖ (TMZ) каби турли саноат соҳалари, улгуржи ва чакана савдо тармоқларида фаолият юритувчи 30 дан тадбиркорлик субъектларининг молия ва бухгалтерия ҳамда кадрлар масалалари бўйича ходимлари иштирок этдилар.

Мазкур қарорга мувофиқ бизнес учун архив, банк, солиқ, статистикага оид ҳисоботларни юритиш, қоғоз шаклида сақлаш ва давлат солиқ, статистика органларига тақдим этиш тартиботларини соддалаштириш кўзда тутилган.

Муҳокамада республикамизда тадбиркорлик субъектлари учун бизнес жараёнларида солиқ, статистика, ходимлар меҳнатига оид ҳисоботларни юритишни қисқартириш ҳамда ҳисоботларни юритишни электрон шаклга ўтказиш масалалари кўриб чиқилди.

Тадбир давомида тадбиркорлик субъектлари томонидан бизнес жараёнида турли ҳисоботларни юритиш, уларни қоғоз шаклида сақлаш ва архив идораларига топшириш борасида ортиқча оворагарчилик ва ҳамон қоғозбозлик ҳолатлари мавжудлигинни таъкидлаб ўтиб, молиявий ва кадрлар меҳнатига оид ҳисобот шаклларини қисқартириш ва айримларини бекор қилиш бўйича таклиф ва тавсиялар билдирилди.

CCП матбуот хизмати