Biznes jarayonlarida qogʼoz shakldagi hisobotlarni soddalashtirish va elektron hujjatlar aylanish tizimini takomillashtirish masalalari muhokama etildi

Oʼzbekiston Savdo-sanoat palatasi tomonidan 2022 yil 17 oktyabrь kuni onlayn tarzda mahalliy tadbirkorlik subʼektlari ishtirokida Oʼzbekiston Respublikasi Prezidentining 2022 yil 30 avgustdagi “Oʼzbekiston Respublikasi Prezidentining tadbirkorlar bilan 2022 yildagi “ochiq muloqoti”da belgilangan vazifalarni amalga oshirish chora-tadbirlari toʼgʼrisida”gi PQ-364-sonli qarori bilan tasdiqlangan “Yoʼl xaritasi”ning 21-bandiga muvofiq tadbirkorlar uchun biznes jarayonlarida qogʼozbozlikni qisqartirishga oid masalalar muhokama etildi.

Tadbirda “HAVAS FOOD” MChJ (Havas), “ANGLESEY FOOD" QK MChJ (Korzinka), “DARVOZA SAVDO” MChJ (Makro), “TOSHKENT METALLURGIYA ZAVODI” QK MChJ (TMZ) kabi turli sanoat sohalari, ulgurji va chakana savdo tarmoqlarida faoliyat yurituvchi 30 dan tadbirkorlik subʼektlarining moliya va buxgalteriya hamda kadrlar masalalari boʼyicha xodimlari ishtirok etdilar.

Mazkur qarorga muvofiq biznes uchun arxiv, bank, soliq, statistikaga oid hisobotlarni yuritish, qogʼoz shaklida saqlash va davlat soliq, statistika organlariga taqdim etish tartibotlarini soddalashtirish koʼzda tutilgan.

Muhokamada respublikamizda tadbirkorlik subʼektlari uchun biznes jarayonlarida soliq, statistika, xodimlar mehnatiga oid hisobotlarni yuritishni qisqartirish hamda hisobotlarni yuritishni elektron shaklga oʼtkazish masalalari koʼrib chiqildi.

Tadbir davomida tadbirkorlik subʼektlari tomonidan biznes jarayonida turli hisobotlarni yuritish, ularni qogʼoz shaklida saqlash va arxiv idoralariga topshirish borasida ortiqcha ovoragarchilik va hamon qogʼozbozlik holatlari mavjudliginni taʼkidlab oʼtib, moliyaviy va kadrlar mehnatiga oid hisobot shakllarini qisqartirish va ayrimlarini bekor qilish boʼyicha taklif va tavsiyalar bildirildi.

SSP matbuot xizmati