Ҳакамлик судлари институтларини ривожлантириш истиқболлари муҳокама қилинди

Жорий йил 24 октябрь куни Ўзбекистон Республикаси Савдо-саноат палатаси ва Конрад Аденауэр номидаги фонд (Германия) билан ҳамкорликда “Wyndham Tashkent” меҳмонхонасида “Ҳакамлик судлари институтларини ривожлантириш истиқболлари” мавзусида конференция  бўлиб ўтди.

Тадбирдан кўзланган мақсад республикамизда ҳакамлик судлари институтлари фаолиятини такомиллаштириш ва улар томонидан қабул қилинадиган қарорларни республика ҳудудида, шунингдек хорижий давлатларда ижро этиш жараёнини оптималлаштириш тизими билан таништиришдан иборатдир.

Мазкур тадбирни Ўзбекистон Савдо-саноат палатаси раисининг биринчи ўринбосари Ислом Жасимов ҳамда Конрад Аденауэр номидаги фонднинг Марказий Осиёдаги Минтақавий ваколатхонаси тадқиқотчиси Азиз Татибаев кириш сўзи билан очиб, сўнгги йилларда Ўзбекистон Республикасида суд тизимида бўлаётган ўзгаришларни таъкидлаб ўтишди. Шунингдек, Савдо-саноат палатаси ҳузурида ташкил этилган 15 та ҳакамлик судлари фаолиятига ижобий баҳо беришди.

Шуни айтиб ўтиш жоизки, Ўзбекистон Республикасининг “Ҳакамлик судлари тўғрисида”, “Ўзбекистон Республикаси Савдо-саноат палатаси тўғрисида”ги қонунларини ижро этиш ҳамда тадбиркорликнинг ривожланиши учун мўтадил иқлимни яратиш ва табиркорларни ҳуқуқий қўллаб-қувватлаш тизимини такомиллаштириш мақсадида Ўзбекистон Республикаси Савдо-саноат палатаси ҳузурида 2007-йилда Ҳакамлик суди ташкил қилинган.

Тадбирда Савдо-саноат палатаси ҳузуридаги ҳакамлик суди Раиси Шерзод Сатторов сўзга чиқиб, ҳакамлик судлари ўз фаолиятини тезкорлик, ишончлилик, тежамкорлик ва профессионаллик тамойиллари асосида олиб бораётганини билдириб ўтди. Бунинг мисоли ўлароқ, жорий йилнинг 3-чорагида Палата ҳузуридаги ҳакамлик судлари томонидан 500 дан ортиқ ҳакамлик иши кўриб чиқилиб, тадбиркорлар ўртасида юзага келган иқтисодий низолар ҳал қилинганини  таькидлади.

Бундан ташқари, очиқ мулоқот шаклида ўтган учрашувда ҳакамлик муҳокамасини тартибга солувчи қонунчиликнинг ҳуқуқий ҳолати, ҳакамлик судларининг ваколатли судлар билан ўзаро муносабатлари, Ўзбекистондаги ва хориждаги ҳакамлик судлари қарорларини тан олиш ва ижро этиш масалари шунингдек, ҳакамлик судлари фаолиятини учинчи шахслар томонидан молиялаштириш мавзуларида соҳа мутахассислари томонидан фикр ва мулоҳазалар билдириб ўтилди.

Тадбирдан сўнг Савдо-саноат палатаси Раисининг биринчи ўринбосари Ислом Жасимов иштирокида Палата биносида Палата ҳузуридаги ҳакамлик судлари фаолияти буйича ҳудудий ҳакамлик судлари раислари иштирокида кенгайтирилган йиғилиш бўлиб ўтди.

ССП матбуот хизмати