Германия ташқи ишлар вазирлиги вакиллари билан давра суҳбати

Жорий йилнинг 1 ноябрь куни Германия Федерал ташқи ишлар вазири Aнналена Бербокнинг Ўзбекистонга ташрифи доирасида Савдо-саноат палатасида Германия мамлакатнинг энг йирик ва илғор корхоналари ишбилармон доира вакиллари иштирокида давра суҳбати бўлиб ўтди.

Тадбирда Ўзбекистон Республикаси Бош вазирининг ёқилғи-энергетика ва кимё соҳаларини ривожлантириш бўйича ўринбосари –  энергетика вазири Жўрабек Мирзамахмудов, Ўзбекистон Савдо-саноат палатаси раиси Даврон Ваҳобов, ССП раиси ўринбосари Жаҳонгир Мамажонов, Ўзбекистон Республикаси Транспорт вазирлиги ва Ўзбекистон Республикаси қурилиш вазирлиги вакиллари иштирок этди.

Германия томонидан Германия Федератив Республикаси Ташқи ишлар вазирлигининг Иқлим, иқтисодиёт ва технологиялар бўйича ташқи сиёсат бошқармаси бошлиғи Оливер Ренчлер, Ташқи ишлар вазирлигининг Иқтисодий дипломатия бўлими бошлиғи Хюльгер Кремер, Германия иқтисодиёти Шарқий қўмитаси ижрочи директори Михаэль Хармс, Германия иқтисодиётининг Марказий Осиёдаги ваколатхонаси ижрочи директори Ховсеп Вокакян, шунингдек, қурилиш, логистика ва энергетика соҳасидаги йирик компания вакиллари иштирок этди.

Мазкур тадбирдан кўзланган мақсад делегацияни мамлакат иқтисодий ривожланишининг бугунги ҳолати ва Ўзбекистон-Германия ҳамкорлигини янада ривожлантиришнинг асосий йўналишлари билан таништиришдан иборат.

Савдо-саноат палатаси раиси Даврон Ваҳобов 2021-йил якуни бўйича мамлакатларимиз ўртасидаги товар айирбошлаш ҳажми 762 миллион долларни ташкил этганини таъкидлаб, Ўзбекистонда Германия инвесторлари иштирокида 201 та корхона, жумладан, 67 та корхона 100% Германия капитали билан, қолаверса 31 нафар фирма ва компанияларнинг ваколат хоналари фаолият юритаётганини айтиб ўтди.

Таъкидлаш жоизки, Палата Германиянинг турли ташкилот ва компаниялари, жумладан, Саксония иқтисодий таълим маркази – BSW, Германия халқаро ҳамкорлик ташкилоти – GIZ, Конрад Aденауэр жамғармаси, Германия иқтисодиётининг Марказий Осиёдаги ваколатхонаси – АНК, "СЕҚУA", "AДЕЛФИ" ва бошқа ташкилотлар билан фаол ҳамкорлик қилиб келяпти.

Мазкур ташкилотлар билан ҳамкорлик Ўзбекистон ва Германия ишбилармон доиралари ўртасида доимий алоқалар ўрнатиш, шунингдек, илғор Германия тажрибасини турли йўналишлар бўйича ўрганиш ва уни Ўзбекистон шароитларига муваффақиятли мослаштиришга хизмат қилмоқда.

Тадбирнинг асосий мавзулари энергетика, қурилиш, транспорт ва логистика соҳаларида икки томонлама алоқаларни мустаҳкамлаш масалалари бўлиб, шунингдек, давра суҳбати давомида икки давлат ишбилармон доиралари ўртасидаги ҳамкорликни янада ривожлантириш мамлакатлар ўртасидаги инвестицион ва савдо-иқтисодий муносабатларнинг ҳал қилувчи омили сифатида муҳокама қилинди.

ССП матбуот хизмати