Маҳаллий заргарлар Палата томонидан қўллаб-қувватланилмоқда

Ўзбекистон Республикаси Президентининг 2023-йил 23-декабрдаги “Заргарлик буюмларини ишлаб чиқариш қувватларини кенгайтириш ва маҳаллий заргарларни ҳар томонлама қўллаб-қувватлаш бўйича қўшимча чора-тадбирлар тўғрисида”ги ПҚ-452-сонли қарорига мувофиқ, маҳаллий ишлаб чиқарувчи тадбиркорларни кенг ҳаридорлар оммасига танитиш мақсадида:

Савдо-саноат палатаси томонидан жорий йилнинг 8 февраль куни Chorsu Gold Center савдо марказида Ўзбекистондаги заргарлик соҳаси учун энг йирик савдо тадбири – УЛГУРЖИ САВДО ЯРМАРКАсининг очилиш маросими бўлиб ўтди.

Тадбирни Ўзбекистон Савдо-саноат палатаси раиси Даврон Ваҳобов, Ўзбекистон Миллий медиа ассоциацияси бошқаруви раиси Шерзодхон Қудратхўжа ва Chorsu Gold Center савдо маркази раҳбари Содиқ Абдуллаев  тантанали равишда очиб берди.

Ўзбекистон дунё миқёсида олтин захираси ва экспорти, тилла ишлаб чиқариш бўйича етакчи давлатлардан ҳисобланади. Лекин ҳали соҳадаги салоҳиятдан тўлақонли фойдаланиляпти, деб ҳам бўлмайди. Масалан, Туркияда беш мингдан ортиқ, Ҳиндистонда ўнг мингдан зиёд, мамлакатимизда эса бугунги кунда 800 нафар атрофида заргарлик маҳсулотлари ишлаб чиқарадиган тадбиркор фаолият юритади.

Сўнгги йилларда заргарлик саноатига давлатимиз раҳбари томонидан алоҳида эътибор қаратилиб, соҳага доир қатор ҳуқуқий ҳужжатлар қабул қилинди. Тизимни ривожлантириш учун зарур шарт-шароит яратилмоқда. Хусусан, Қимматбаҳо металларни товар-хомашё биржаси орқали кечиктириб тўлаш шарти билан сотиш тартибининг амал қилиш муддати 2026 йил 1 январга қадар узайтирилди.

Маҳаллий заргарларни қўллаб-кувватлаш мақсадида ташкил этилган ушбу кўргазма 8-9,15-16 va 22-23 февраль кунлари, шунингдек, доимий равишда апрель ойига қадар давом этади.

Улгуржи савдо ярмаркаси бутун заргарлик саноатини бирлаштирадиган ягона маскан бўлиб, ушбу кўргазмада қимматбаҳо, ҳашаматли, тилла ва замонавий дизайндаги заргарлик буюмлари тадбир меҳмонларига намойиш этилади.

Таъкидлаш жоизки, заргарлик соҳасини маҳаллий саноатнинг асосий драйверларидан бирига айлантириш, қимматбаҳо металлар ва қимматбаҳо тошлардан заргарлик буюмларини ишлаб чиқариш фаолияти ҳамда савдосини қўллаб-қувватлаш мақсадида бу каби кўргазмаларни ташкил этиш муҳим ҳисобланади.

ССП матбуот хизмати