Ўзбекистонда рақамли трансформация ривожланмоқда

Ўзбекистон Савдо-саноат палатаси кўмагида, жорий йилнинг 22 февраль куни “International Hotel Tashkent” меҳмонхонасида “Давлат ҳокимияти органлари, бизнес ва таълимда рақамли трансформация” мавзусида халқаро конференция бўлиб ўтди.

Айтиб ўтиш жоизки, ахборотлаштириш, алоқа ва телекоммуникация технологиялари соҳасини ривожлантириш республикамизнинг асосий устувор йўналишларидан биридир. Ўзбекистон Республикаси Президентининг 2020-йил 5-октябрдаги ПФ-6079-сон қарори билан тасдиқланган “Рақамли Ўзбекистон – 2030” стратегияси ва уни самарали амалга ошириш чора-тадбирлари қабул қилингани бунинг тасдиғидир.

Мазкур конференция юқори бўғин раҳбарлари, жумладан, компания ва ташкилотлар ТОП-менеджерлари, IT-департаментлар раҳбарлари ва маданий объектларнинг вакиллари учун мўлжалланган бўлиб, аудиовизуал лойиҳалар ва ахборот технологиялари соҳасида ечимларни ишлаб чиқиш бўйича тажриба ва фикр алмашиш учун майдон ҳисобланади.

Конференция давомида Polymedia компанияси, Халқаро янги таълим технологиялари институти, Россия Федерацияси ҳукуматининг мувофиқлаштирувчи маркази экспертлари ва бошқалар ўз маърузалари билан ўртоқлашдилар.

Конференция иштирокчилари давлат ҳокимияти органлари ва корпорациялар учун бошқарув марказларни, тезкор марказларни лойиҳалаш ва ташкиллаштириш ҳақида маълумот олдилар.

Шунингдек, МДҲ мамлакатлари ва Ўзбекистондаги лойиҳалар, ҳалқаро тажриба, глобал кейслар, бизнес ва таълимдаги рақамли трансформациянинг муҳим жиҳатлари, ҳусусан, музейлар ва кўргазма марказлари бўйича креатив ечимлар ҳақида ҳам тақдимотлар ўтказилди.

Бундан ташқари, тадбирда ҳалқаро лойиҳалар тажрибаси, шунингдек,  Polymedia халқаро экспертларининг AV-индустриядаги трендлар, таълим ва ахборот технологиялари ҳақидаги маълумотлари муҳокама қилинди.

ССП матбуот хизмати