O‘zbekistonda raqamli transformatsiya rivojlanmoqda

O‘zbekiston Savdo-sanoat palatasi ko‘magida, joriy yilning 22 fevral kuni “International Hotel Tashkent” mehmonxonasida “Davlat hokimiyati organlari, biznes va taʼlimda raqamli transformatsiya” mavzusida xalqaro konferensiya bo‘lib o‘tdi.

Aytib o‘tish joizki, axborotlashtirish, aloqa va telekommunikatsiya texnologiyalari sohasini rivojlantirish respublikamizning asosiy ustuvor yo‘nalishlaridan biridir. O‘zbekiston Respublikasi Prezidentining 2020-yil 5-oktabrdagi PF-6079-son qarori bilan tasdiqlangan “Raqamli O‘zbekiston – 2030” strategiyasi va uni samarali amalga oshirish chora-tadbirlari qabul qilingani buning tasdig‘idir.

Mazkur konferensiya yuqori bo‘g‘in rahbarlari, jumladan, kompaniya va tashkilotlar TOP-menedjerlari, IT-departamentlar rahbarlari va madaniy obʼektlarning vakillari uchun mo‘ljallangan bo‘lib, audiovizual loyihalar va axborot texnologiyalari sohasida yechimlarni ishlab chiqish bo‘yicha tajriba va fikr almashish uchun maydon hisoblanadi.

Konferensiya davomida Polymedia kompaniyasi, Xalqaro yangi taʼlim texnologiyalari instituti, Rossiya Federatsiyasi hukumatining muvofiqlashtiruvchi markazi ekspertlari va boshqalar o‘z maʼruzalari bilan o‘rtoqlashdilar.

Konferensiya ishtirokchilari davlat hokimiyati organlari va korporatsiyalar uchun boshqaruv markazlarni, tezkor markazlarni loyihalash va tashkillashtirish haqida maʼlumot oldilar.

Shuningdek, MDH mamlakatlari va O‘zbekistondagi loyihalar, halqaro tajriba, global keyslar, biznes va taʼlimdagi raqamli transformatsiyaning muhim jihatlari, hususan, muzeylar va ko‘rgazma markazlari bo‘yicha kreativ yechimlar haqida ham taqdimotlar o‘tkazildi.

Bundan tashqari, tadbirda halqaro loyihalar tajribasi, shuningdek,  Polymedia xalqaro ekspertlarining AV-industriyadagi trendlar, taʼlim va axborot texnologiyalari haqidagi maʼlumotlari muhokama qilindi.

SSP matbuot xizmati