Миср заргарлик саноатининг етакчи вакиллари Ўзбекистонга ташриф буюрди

Ўзбекистон Республикаси Президентининг 2023 йил 19–20 февраль кунлари Миср Араб Республикасига амалга оширган давлат ташрифи даврида берилган топшириқлар ижросини таъминлаш мақсадида Миср Араб Республикасининг заргарлик саноатининг етакчи вакилларининг мамлакатимизга ташрифи ташкиллаштирилди. 

26 февраль куни Миср араб республикасининг заргарлик қўмитаси раиси Ихаб Вассеф, «Kirmena Jewellery» компанияси таъсисчиси Мамдух Абдалла Габала, «King Gold» таъсисчиси Шакер Файзи Шакер ҳамда «Helwan» университети профессори Карам Мосаад Ахмед Мохамед Фараг ташриф буюришди ва ҳозирда мамлакатимиздаги заргарлик соҳаси билан танишмоқда.

Делегация аъзолари Ўзбекистоннинг заргарлик бозорини ўрганиш мақсадида Чилонзор туманида жойлашган «Олтин маркази» мажмуасида бўлиб, юртимизда ишлаб чиқарилаётган ҳамда хориждан олиб келинган маҳсулотлар сифати ва нархлар таҳлилини амалга оширдилар.

Шунингдек, «Gold Moon Tashkent» (Fonon), «UzGold» ва «Silk Way Jewellery» заргарлик корхоналарига, Иқтисодий ислохотлар тадқиқот маркази, Олий таълим, фан ва инновациялар вазирлиги, Олмалиқ кон металлургия комбинатига ва Тошкент тўқимачилик ва енгил саноат институтида мутахассислар билан учрашувлар ташкил этилади.

Делегация аъзолари 28 февраль куни Тошкент ва Бухоро вилоятларига бориб, вилоят ҳокимлари ва маҳаллий заргарлар билан учрашувлар ўтказиши режалаштирилган.

ССП матбуот хизмати