Испания ишбилармон доиралари билан иқтисодиёт соҳаларида бизнес мулоқотлар ўтказилди

Жорий йил 1 март куни Ўзбекистон Савдо-саноат палатаси билан ҳамкорликда Ўзбекистон Республикаси Инвестициялар, саноат ва савдо вазирлиги ва Испания Саноат, савдо ва туризм вазирлиги томонидан икки давлат ишбилармон доиралари иштирокида Тошкент шаҳрида Ўзбекистон-Испания Бизнес-форуми ўтказилди.

Мазкур Бизнес-форумда Испаниядан қишлоқ ва сув хўжалиги, энергетика, тежамкор технологиялар, шаҳарсозлик, архитектура, қурилиш материаллари, транспорт, қишлоқ хўжалиги техникалари, фармацевтика, туризм, ахборот технологиялари ва бошқа саноат тармоқларининг 45 та етакчи компанияларидан иборат делегацияси иштирок этди.

Ўзбекистон томонидан ушбу Бизнес-форумда турли иқтисодиёт соҳаларида фаолият юритувчи 60 нафардан ортиқ маҳаллий тадбиркорлик субъектлари қатнашдилар.

Тадбирда Испания Савдо палатаси Халқаро ҳамкорлик бўйича директори Хайме Монталво томонидан Испания ва Ўзбекистон ишбилармон доиралари ўртасида ҳамкорлик муносабатларини ривожлантириш истиқболлари ва бу борада икки давлат ишбилармонлари учун яратилаётган янги имкониятлар тўғрисида маъруза қилди.

Шунингдек, тадбирда Ўзбекистон Савдо-саноат палатаси раисининг биринчи ўринбосари И.Жасимов сўзга чиқиб, Ўзбекистон ва Испания ўртасида келгусида савдо-иқтисодий ва инвестициявий ҳамкорлик алоқаларини янада кенгайтиришнинг истиқболли йўналишлар тўғрисида батафсил тўхталиб ўтди.

Бизнес-форум доирасида Ўзбекистон ва Испания ишбилармонлари ўртасида В2В форматидаги учрашувлар ўтказилиб, унда томонлар машинасозлик, озиқ-овқат, қишлоқ хўжалиги, энергетика, тежамкор технологияларни сув хўжалигига жорий этиш, фармацевтика, банк-молия соҳаси, консалтинг хизматлари ва боқша йўналишларда ҳамкорлик лойиҳаларини муҳокама қилдилар.

ССП матбуот хизмати