Ўзбекистон ва Россия ишбилармон доиралари ўртасида текстиль саноатида ҳамкорлик масалалари муҳокама этилди

Россия Экспорт Маркази томонидан ташкил этилган Россиянинг текстиль саноатидаги экспортер аёллар делегациясининг Ўзбекистонга ташрифи доирасида жорий йил 15 март куни Тошкент шаҳрида икки давлат текстиль корхоналари вакилларининг бизнес мулоқоти ташкил этилди.

Ўзбекистон Савдо-саноат палатаси тадбирга маҳаллий тадбиркорлик субъектларини жалб этишга кўмаклашди. Жумладан, мазкур учрашувда Россиядан текстиль саноатида фаолият юритувчи 20 тадан ортиқ экспортерлар вакиллари ва Ўзбекистондан текстиль саноатининг 80 га яқин тадбиркорлари иштирок этдилар.

Тадбирни очилиш маросимида Ўзбекистон Савдо-саноат палатаси раисининг биринчи ўринбосари Ислом Жасимов нутқ сўзлаб, ўз маърузасида Ўзбекистон ва Россия ўртасидаги савдо-иқтисодий ва инвестициявий ҳамкорлик муносабатларига қисқача тўхталиб ўтди.

Бугунги кунда Россия Ўзбекистоннинг текстиль маҳсулотларини экспорт қилиш бўйича энг асосий ҳамкорларидан саналади. 2022 йил якунига кўра Россияга республикамиздан экспорт қилинган текстиль маҳсулотлари ҳажми 1,3 млрд. долларни ташкил этади. Шу билан бирга Ўзбекистондла айнан текстиль саноатининг ўрни йил сайин ортиб бораётганлиги ва бу соҳа иқтисодиётнинг етакчи саноат тармоғига айланганлиги алоҳида таъкидлаб ўтилди.

Тадбир давомида Ўзбекистон ва Россиянинг текстиль саноатидаги етакчи компаниялар вакиллари, дизайнерлар, бренд соҳаси экспертлари томонидан мавзуга оид тақдимотлар ўтказилди.

Тадбирнинг иккинчи қисмида икки давлат ишбилармон доиралари ўртасида В2В форматидаги бизнес учрашувлар ташкил этилиб, текстиль маҳсулотларини Россияга етказиб бериш, қўшма лойиҳаларин амалга ошириш, янги бренд маҳсулотларни яратиш борасида музокаралар бўлиб ўтди.

ССП матбуот хизмати