Коррупцияга қарши курашиш Хартияси аъзолигига қўшилиш тўғрисидаги билдиришномаларни кўриб чиқиш бўйича Махсус комиссиянинг 6-йиғилиши бўлиб ўтди

2023 йилнинг 5 апрель куни Ўзбекистон Савдо-саноат палатасида Коррупцияга қарши курашиш Хартияси аъзолигига қўшилиш истагини билдирган 108 та тадбиркорлик субъектларининг билдиришномалари кўриб чиқилди. Билдиришномалар республиканинг барча ҳудудларидан юборилган. Шундан, Бухоро ва Навоий вилоятларида фаолият юритувчи тадбиркорлар энг кўп билдиришнома юборишган.

Йиғилишга Савдо-саноат палатаси Раисининг биринчи ўринбосари И.К.Жасимов раҳбарлик қилди, тадбирда Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девони ҳамда  Коррупцияга қарши курашиш агентлиги вакиллари иштирок этди.

Тадбир бошида Савдо-саноат палатаси Раисининг биринчи ўринбосари Ислом Жасимов сўзга чиқиб, Хартия қоидалари бизнес юритишда антикоррупцион маданиятни шакллантириш, тадбиркорларнинг ҳуқуқий онгини ва қонунга итоаткорлигини оширишга ҳамда коррупцияга нисбатан муросасиз ва тоқатсизлик муҳитини яратишга хизмат қилишини алоҳида таъкидлади. Шу ўринда, бизнес учун яратилаётган кенг имкониятлар, Хартияни қабул қилишдан кўзланган асосий мақсад ва унга қўшилиш тартиби ҳамда коррупция хавфларининг олдини олишдаги роли ҳақида иштирокчиларга атрофлича ахборот берди. 

Маълумот учун: Хартия — тадбиркорлик субъектининг молиявий фаолиятини бошқариш, шартнома муносабатлари, кадрларни танлаш ва ўқитиш, ички интизом ва қонунийликни мустаҳкамлаш, давлат харидлари каби муҳим йўналишларда коррупция хавфларининг олдини олишга қаратилган комплекс чораларни ўз ичига олган.

Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Ўзбекистон Республикаси Коррупцияга қарши курашиш агентлиги ва Ўзбекистон Республикаси Савдо-саноат палатасининг қўшма қарорига асосан қабул қилинган «Коррупцияга қарши курашиш Хартияси аъзолигига қўшилиш ва ягона Рестрни юритиш тартиби тўғрисида»ги Низомга мувофиқ, хўжалик юритувчи субъектларнинг Хартияга қўшилиш тўғрисидаги билдиришномаларини кўриб чиқиш бўйича Палата ҳузурида Махсус комиссия тузилган.

Тадбир якунида махсус комиссия томонидан республика бўйича 108 нафар тадбиркорлик субъектларининг Хартияга қўшилиш бўйича билдиришномалари кўриб чиқилиб, уларга Хартияга аъзолик сертификатини топшириш тўғрисида қарор қабул қилинди. Шундай қилиб, бугунги кун ҳолатига Коррупцияга қарши курашиш Хартияси аъзолари сони 373 нафарни ташкил этди.

ССП матбуот хизмати