Korrupsiyaga qarshi kurashish Xartiyasi aʼzoligiga qo‘shilish to‘g‘risidagi bildirishnomalarni ko‘rib chiqish bo‘yicha Maxsus komissiyaning 6-yig‘ilishi bo‘lib o‘tdi

2023 yilning 5 aprel kuni O‘zbekiston Savdo-sanoat palatasida Korrupsiyaga qarshi kurashish Xartiyasi aʼzoligiga qo‘shilish istagini bildirgan 108 ta tadbirkorlik subyektlarining bildirishnomalari ko‘rib chiqildi. Bildirishnomalar respublikaning barcha hududlaridan yuborilgan. Shundan, Buxoro va Navoiy viloyatlarida faoliyat yurituvchi tadbirkorlar eng ko‘p bildirishnoma yuborishgan.

Yig‘ilishga Savdo-sanoat palatasi Raisining birinchi o‘rinbosari I.K.Jasimov rahbarlik qildi, tadbirda O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil devoni hamda Korrupsiyaga qarshi kurashish agentligi vakillari ishtirok etdi.

Tadbir boshida Savdo-sanoat palatasi Raisining birinchi o‘rinbosari Islom Jasimov so‘zga chiqib, Xartiya qoidalari biznes yuritishda antikorrupsion madaniyatni shakllantirish, tadbirkorlarning huquqiy ongini va qonunga itoatkorligini oshirishga hamda korrupsiyaga nisbatan murosasiz va toqatsizlik muhitini yaratishga xizmat qilishini alohida taʼkidladi. Shu o‘rinda, biznes uchun yaratilayotgan keng imkoniyatlar, Xartiyani qabul qilishdan ko‘zlangan asosiy maqsad va unga qo‘shilish tartibi hamda korrupsiya xavflarining oldini olishdagi roli haqida ishtirokchilarga atroflicha axborot berdi. 

Maʼlumot uchun: Xartiya — tadbirkorlik subyektining moliyaviy faoliyatini boshqarish, shartnoma munosabatlari, kadrlarni tanlash va o‘qitish, ichki intizom va qonuniylikni mustahkamlash, davlat xaridlari kabi muhim yo‘nalishlarda korrupsiya xavflarining oldini olishga qaratilgan kompleks choralarni o‘z ichiga olgan.

O‘zbekiston Respublikasi Prezidenti huzuridagi Tadbirkorlik subʼektlarining huquqlari va qonuniy manfaatlarini himoya qilish bo‘yicha vakil, O‘zbekiston Respublikasi Korrupsiyaga qarshi kurashish agentligi va O‘zbekiston Respublikasi Savdo-sanoat palatasining qo‘shma qaroriga asosan qabul qilingan «Korrupsiyaga qarshi kurashish Xartiyasi aʼzoligiga qo‘shilish va yagona Restrni yuritish tartibi to‘g‘risida”gi Nizomga muvofiq, xo‘jalik yurituvchi subyektlarning Xartiyaga qo‘shilish to‘g‘risidagi bildirishnomalarini ko‘rib chiqish bo‘yicha Palata huzurida Maxsus komissiya tuzilgan.

Tadbir yakunida maxsus komissiya tomonidan respublika bo‘yicha 108 nafar tadbirkorlik subyektlarining Xartiyaga qo‘shilish bo‘yicha bildirishnomalari ko‘rib chiqilib, ularga Xartiyaga aʼzolik sertifikatini topshirish to‘g‘risida qaror qabul qilindi. Shunday qilib, bugungi kun holatiga Korrupsiyaga qarshi kurashish Xartiyasi aʼzolari soni 373 nafarni tashkil etdi.

SSP matbuot xizmati