Бошланғич синф ўқувчиларини бепул озиқ-овқат билан таъминлаш масалалари муҳокама қилинди

Жорий йилнинг 10 май куни Савдо-саноат палатаси Раиси Даврон Вахабов бошчилигида кейтеринг ва аутсорсинг соҳасида фаолият юритувчи 70 дан ортиқ тадбиркорлар иштирокида бошланғич синф ўқувчиларини бепул озиқ-овқат билан таъминлаш масалаларини муҳокама қилиш мақсадида видеоконференцалоқа орқали учрашув бўлиб ўтди.

Эслатиб ўтамиз, Ўзбекистон Республикаси Президентининг 2023 йил 28 февралдаги ПФ-27-сон Фармонига мувофиқ 2023-2024 ўқув йилидан бошлаб республиканинг барча ҳудудларида умумий ўрта таълим муассасаларининг бошланғич синф ўқувчиларини бир маҳал бепул озиқ-овқат билан таъминлашни жорий этиш белгиланган.

Мазкур тизимни давлат-хусусий шерикчилик тамойили асосида маҳаллий озиқ-овқат маҳсулотлари ишлаб чиқарувчиларни жалб этган ҳолда амалга ошириш ҳамда давлат маблағлари ҳисобидан қопланиши кўзда тутилган.

Айтиб ўтиш жоизки, 2023-2024 ўқув йилида жами 10 104 та умумий ўрта таълим муассасаларида таълим оладиган бошланғич синф ўқувчилари сони 2,6 млн нафар бўлиши кутилмоқда. Ушбу 10 104 та мактабларнинг 6 562 тасида ошхона ёки буфет мавжуд бўлса, 3 542 тасида ошхона мавжуд эмас.

Ушбу учрашувда барча ҳудудларда умумий ўрта таълим муассасаларининг бошланғич синф ўқувчиларини бир маҳал бепул озиқ-овқат билан таъминлашни жорий этиш масалалари ва озиқ-овқат маҳсулотлари билан бепул таъминлашда Жаҳон соғлиқни сақлаш ташкилоти ҳамда Озиқ-овқат ва қишлоқ хўжалиги ташкилотларининг болаларни соғлом овқатлантириш бўйича тавсиялари муҳокама қилинди.

Учрашув якуни бўйича бошланғич синф ўқувчилари учун таомномалар бўйича таклифлар бериш тўғрисида келишиб олинди.

ССП матбуот хизмати