Boshlang‘ich sinf o‘quvchilarini bepul oziq-ovqat bilan ta’minlash masalalari muhokama qilindi

Joriy yilning 10 may kuni Savdo-sanoat palatasi Raisi Davron Vaxabov boshchiligida keytering va autsorsing sohasida faoliyat yurituvchi 70 dan ortiq tadbirkorlar ishtirokida boshlang‘ich sinf o‘quvchilarini bepul oziq-ovqat bilan ta’minlash masalalarini muhokama qilish maqsadida videokonferensaloqa orqali uchrashuv bo‘lib o‘tdi.

Eslatib o‘tamiz, O‘zbekiston Respublikasi Prezidentining 2023 yil 28 fevraldagi PF-27-son Farmoniga muvofiq 2023-2024 o‘quv yilidan boshlab respublikaning barcha hududlarida umumiy o‘rta ta’lim muassasalarining boshlang‘ich sinf o‘quvchilarini bir mahal bepul oziq-ovqat bilan ta’minlashni joriy etish belgilangan.

Mazkur tizimni davlat-xususiy sherikchilik tamoyili asosida mahalliy oziq-ovqat mahsulotlari ishlab chiqaruvchilarni jalb etgan holda amalga oshirish hamda davlat mablag‘lari hisobidan qoplanishi ko‘zda tutilgan.

Aytib o'tish joizki, 2023-2024 o‘quv yilida jami 10 104 ta umumiy o‘rta ta’lim muassasalarida ta’lim oladigan boshlang‘ich sinf o‘quvchilari soni 2,6 mln nafar bo‘lishi kutilmoqda. Ushbu 10 104 ta maktablarning 6 562 tasida oshxona yoki bufet mavjud bo‘lsa, 3 542 tasida oshxona mavjud emas.

Ushbu uchrashuvda barcha hududlarda umumiy o‘rta ta’lim muassasalarining boshlang‘ich sinf o‘quvchilarini bir mahal bepul oziq-ovqat bilan ta’minlashni joriy etish masalalari va oziq-ovqat mahsulotlari bilan bepul ta’minlashda Jahon sog‘liqni saqlash tashkiloti hamda Oziq-ovqat va qishloq xo‘jaligi tashkilotlarining bolalarni sog‘lom ovqatlantirish bo‘yicha tavsiyalari muhokama qilindi.

Uchrashuv yakuni bo‘yicha boshlang‘ich sinf o‘quvchilari uchun taomnomalar bo‘yicha takliflar berish to‘g‘risida kelishib olindi.

SSP matbuot xizmati