Ўзбекистон ва Германия ўртасидаги ҳамкорликни янада чуқурлаштиришнинг устувор йўналишлари муҳокама қилинди

Ўзбекистон Президенти Шавкат Мирзиёевнинг 2-3-май кунлари Германияга расмий ташрифи икки давлат муносабатларида янги саҳифа очди.

Давлат раҳбари ушбу ташриф чоғида жаҳон иқтисодиётидаги кенг кўламли ва жиддий зарбаларнинг янги воқеликларида Ўзбекистон немис бизнеси учун самарали ва ишончли платформага айланиши муҳимлиги ҳақида гапирди.

Мазкур ташрифнинг мантиқий давоми сифатида икки томонлама муносабатларни юқори босқичга олиб чиқиш мақсадида 12 май куни Ўзбекистон Савдо-саноат палатаси Германия иқтисодиётининг Марказий Осиёдаги ваколатхонаси билан ҳамкорликда икки мамлакат вазирлик ва идоралари, шунингдек, бизнес доиралари иштирокида ишбилармонлар мулоқотини ташкил этди.

Мазкур тадбирдан кўзланган асосий мақсад Савдо-саноат палатаси билан Германия делегацияси аъзолари ўртасида ишбилармонлик алоқаларини ўрнатиш, Ўзбекистонда амалга оширилаётган йирик сармоявий лойиҳаларни тақдим этиш ва муҳокама қилиш, шунингдек, ҳамкорликни янада чуқурлаштиришнинг устувор йўналишларини белгилашдан иборат.

Ўзбекистон Савдо-саноат палатаси раиси Даврон Вахабов ҳамда Германия Иқтисодиёт ва иқлимни муҳофаза қилиш федерал вазирлиги ташқи савдо департаменти бошлиғи Доминик Шнихелс кириш сўзи билан тадбирни очиб берди.

Тадбирда Германиянинг “яшил” энергетика, қишлоқ хўжалиги, кимё, тоғ-кон саноати, тўқимачилик, электротехника саноати ва бошқа соҳаларда йирик лойиҳаларда иштирок этаётган компаниялари ҳам иштирок этди.

Натижада Ўзбекистон ва Германия ишбилармонлари ўртасида Б2Б бўйича музокаралар олиб борилиб, бир қатор ҳамкорлик шартномалари, жумладан, Ўзбекистон Савдо-саноат палатаси ва Германия тўқимачилик уюшмаси – Гесамтмасче ўртасида ҳамкорлик тўғрисидаги меморандум имзоланди.

Якунда томонлар музокаралар натижаларидан мамнун эканлигини билдирди ва биргаликдаги тадбирларни амалга оширишда келгусида ҳамкорлик қилишга келишиб олди.

ССП матбуот хизмати