Саноат ярмаркалари қачон ва қаерда ўтказилади

Вазирлар Маҳкамасининг 11.05.2023 йилдаги “2023 йилда ҳудудий вa республика тармоқлараро саноат ярмаркаларини ташкил этиш ва ўтказиш чора-тадбирлари тўғрисида”ги 195-сон қарори қабул қилинди.

Ярмарка май ойининг охирида Самарқанд вилоятида бошланади, якунловчи ярмарка эса декабрь ойида Тошкент шаҳрида ўтказилади.

Ҳудудий ва республика тармоқлараро саноат ярмаркаларини молиялаштириш ушбу ярмаркалар ташкилотчилари ва уларда иштирок этувчи томонлар маблағлари ҳисобидан амалга оширилади.

Инвестициялар, саноат ва савдо вазирлиги ҳузуридаги Рақамли трансформация марказининг электрон кооперация порталида тармоқлар ва корхоналар томонидан ишлаб чиқариладиган тайёр маҳсулотлар, бутловчи буюмлар, хом ашё ва материалларнинг рўйхати шакллантирилади.

Ҳужжат билан қуйидагилар тасдиқланди:

• 2023 йилда ҳудудий ва республика тармоқлараро саноат ярмаркаларини ўтказиш режа-жадвали;
• 2023 йилда ҳудудий тармоқлараро саноат ярмаркаларини ташкил этиш ва ўтказиш чора-тадбирлари режаси;
• 2023 йилда республика тармоқлараро саноат ярмаркаларини ташкил этиш ва ўтказиш чора-тадбирлари режаси ва бошқалар.

Ҳужжат Қонун ҳужжатлари маълумотлари миллий базасида эълон қилинган ва 12.05.2023 йилдан кучга кирди.

Лола Абдуазимова