Ўзбекистон Республикаси Президентининг “Савдо-саноат палатаси фаолиятини янада такомиллаштириш бўйича қўшимча чора-тадбирлар тўғрисида”ги Қарори ижрода

Ўзбекистон Республикаси Президентининг 2023 йил 23 январида ПҚ-15-сонли “Савдо-саноат палатаси фаолиятини янада такомиллаштириш бўйича қўшимча чора-тадбирлар тўғрисида”ги Қарори қабул қилинган.

Ушбу қарорда белгиланган вазифаларни ижро этиш ва қонунчилик ҳужжатларига ушбу қарордан келиб чиқадиган ўзгартириш ва қўшимчалар киритиш мақсадида Ўзбекистон Республикаси Президентининг “Савдо-саноат палатаси фаолияти такомиллаштирилиши муносабати билан Ўзбeкистон Рeспубликаси Прeзидeнтининг айрим ҳужжатларига ўзгартириш ва қўшимчалар киритиш тўғрисида”ги фармони (ПФ–73-сон, 17.05.2023 й.) қабул қилинди.

Фармонга кўра, Савдо-саноат палатасининг туманлар ва шаҳарлардаги Тадбиркорликка кўмаклашиш марказлари Савдо-саноат палатасининг туман (шаҳар) бўлимлари деб қайта номланди.

Эндиликда давлат органлари ва идоралар томонидан тадбиркорликка оид барча ташқи беғараз кўмак лойиҳаларини амалга оширишда Савдо-саноат палатаси лойиҳа ҳамкори сифатида жалб қилинади.

Ўзбекистон Республикаси Савдо-саноат палатаси ўз манфаатлари ва тадбиркорлик субъектларининг манфаатлари ҳимоясида Ўзбекистон Республикаси судларига тақдим этадиган ариза, мурожаат, шикоят ва даъволари учун давлат божи тўловларидан озод этилди.

Савдо-саноат палатаси даромадларини шакллантириш манбаларига давлат субсидиялари ҳам қўшилди.

Президент фармони расмий эълон қилинган кундан бошлаб кучга кирди.

ССП матбуот хизмати