Тадбиркорларнинг таклиф ва ташаббуслари тингланди

Жорий йилнинг июль ойида Ўзбекистон Савдо-саноат палатаси ташаббуси билан республика бўйлаб “Тадбиркорлик ривожи учун янги таклиф ва ташаббуслар” шиори остида тадбиркорлар билан учрашувлар бўлиб ўтмоқда.

Ушбу тадбирларда жами 2 000 нафардан ортиқ тадбиркорлик субъектлари фаол иштирок этиб, тадбиркорлик соҳасига янада кўпроқ имкониятлар беришга қаратилган таклиф ва фикр-мулоҳазаларини билдиришди.

Жумладан, ҳудудларда ўтказилган тадбирлар жараёнида солиқ, божхона, логистика, қурилиш, туризм, қишлоқ хўжалиги, чорвачилик каби мавзулардаги 100 га яқин муҳим таклифлар тўпланди. Айни пайтда ушбу таклифлар мутахассис ва малакали экспертлар иштирокида чуқур таҳлил этилмоқда.

Маълумки, мамлакатимизда амалга оширилаётган ислоҳотлар кўлами узлуксиз равишда кенгайиб бормоқда. Шунга яраша, тадбиркорлик фаолияти соҳасида ҳам кескин ривожланишлар рўй бермоқда.

Бундай вазиятда тадбиркорлик субъектларининг фикр-мулоҳазаларини тизимли ўрганиш, уларнинг эркин ва самарали фаолиятини таъминлашга хизмат қилувчи муҳим шарт-шароитларни аниқлаш ва амалиётда  жорий этиш муҳим аҳамиятга эга.

Навбатдаги “Тадбиркорлик ривожи учун янги таклиф ва ташаббуслар” шиори остидаги тадбиркорлар билан учрашув жорий йилнинг 20 июль куни Тошкент шаҳрида 200 нафардан ортиқ бизнес вакиллари билан Ўзбекистон Савдо-саноат палатаси Раиси Даврон Вахабов, Тадбиркорликни қўллаб-қувватлаш Жамоатчилик кенгаши аъзолари ҳамда соҳа экспертлари иштирокида очиқ мулоқот форматида бўлиб ўтди. 

Ушбу очиқ мулоқотни ўтказишдан кўзланган асосий мақсад, тадбиркорлик соҳасида кузатилаётган тизимли муаммоларни ўрганиш, уларни муҳокама қилиш, шунингдек, тадбиркорларга қулайлик ва янгилликлар яратишга қаратилган таклифлар ишлаб чиқишдан иборат.

Мазкур тадбирда солиқ, аудит, божхона, бухгалтерия, қонунчилик ва ҳуқуқ соҳаларидаги етакчи экспертлар иштирок этиб, тадбиркорларнинг саволларига батафсил жавоблар беришди.

Ушбу тадбирда ҳудудларда ўтказилган учрашувлар давомида тадбиркорлик субъектлари томонидан амалдаги қонунчиликка ўзгартириш киритишга қаратилган таклифлари муҳокама қилинди, қолаверса, тадбиркорлар фаолиятида рўй бераётган тизимли муаммо ва таклифлар билдириб, уларни бартараф этиш мақсадида тегишли вазирлик ва идораларга таклифлар киритилиши белгилаб олинди.

Таъкидлаш жоизки, бу каби тадбирлар юртимизда тадбиркорлик соҳасини ривожлантириш ва тадбиркорлар фаолиятини енгиллаштириб, уларга қулай ишбилармонлик мухитини яратишда хизмат қилади.

ССП Матбуот хизмати