Гамбург Савдо палатасининг Шарқий Европа қўмитаси раиси билан учрашув бўлиб ўтди

Жорий йилнинг 20 июль куни Ўзбекистон Савдо-саноат палатаси раиси Даврон Вахабов ва Гамбург Савдо палатасининг Шарқий Европа қўмитаси раиси Новак Стефан Мирко ўртасида учрашув бўлиб ўтди.

    
Учрашув давомида хорижий томон савдо-иқтисодий ва таълим йўналишларида ҳамкорликни йўлга қўйиш учун Ўзбекистон бозорига катта қизиқиш билдирди.

Хусусан, Стефан Мирко Ўзбекистон Савдо-саноат палатаси ва Гамбург Савдо-саноат палатаси ўртасида тадбиркорларни жалб қилиб, қўллаб-қувватлаш модулларидан фойдаланган ҳолда қўшма лойиҳаларни амалга оширишга кўмаклашувчи Ўзбекистон-Германия Иқтисодий палатасини ташкил этишни таклиф қилди.

Ушбу платформа Ўзбекистон ва Германия ўртасидаги савдо-иқтисодий муносабатларни ривожлантиришга хизмат қилади ҳамда Ўзбекистон қишлоқ хўжалиги ва тўқимачилик маҳсулотларини Европа бозорларига фаол тарғиб қилишга кўмаклашади.

Шунингдек, дуал таълим соҳасида ҳамкорлик қилишга ҳам қизиқиш билдирилди, хусусан, Германияга юбориш орқали малакали кадрлар тайёрлаш лойиҳасини амалга ошириш бўйича келишувга эришилди.

Бундан ташқари, хорижий томон жорий йилнинг 13-15 сентябрь кунлари Германия Савдо-саноат палатаси Ташқи савдо департаменти бошлиғи Фолькер Трейер бошчилигидаги Германия Савдо палаталари ва тадбиркорлари делегациялари ташрифи ҳақида маълумот берди.

Бўлажак ташрифдан кўзланган асосий мақсад Ўзбекистон ва Германия ўртасидаги савдо-иқтисодий муносабатларнинг бугунги ҳолати ва истиқболлари юзасидан фикр алмашиш, Ўзбекистоннинг етакчи корхоналари билан учрашувлар ташкил этиш, савдо-иқтисодий соҳада икки томонлама ҳамкорликни йўлга қўйиш юзасидан музокаралар олиб боришдан иборат.

ССП Матбуот хизмати