Gamburg Savdo palatasining Sharqiy Yevropa qo‘mitasi raisi bilan uchrashuv bo‘lib o‘tdi

Joriy yilning 20 iyul kuni O‘zbekiston Savdo-sanoat palatasi raisi Davron Vaxabov va Gamburg Savdo palatasining Sharqiy Yevropa qoʻmitasi raisi Novak Stefan Mirko o‘rtasida uchrashuv bo‘lib o‘tdi.

Uchrashuv davomida xorijiy tomon savdo-iqtisodiy va ta’lim yo‘nalishlarida hamkorlikni yo‘lga qo‘yish uchun O‘zbekiston bozoriga katta qiziqish bildirdi.

Xususan, Stefan Mirko O‘zbekiston Savdo-sanoat palatasi va Gamburg Savdo-sanoat palatasi o‘rtasida tadbirkorlarni jalb qilib, qo‘llab-quvvatlash modullaridan foydalangan holda qo‘shma loyihalarni amalga oshirishga ko‘maklashuvchi O‘zbekiston-Germaniya Iqtisodiy palatasini tashkil etishni taklif qildi.

Ushbu platforma O‘zbekiston va Germaniya o‘rtasidagi savdo-iqtisodiy munosabatlarni rivojlantirishga xizmat qiladi hamda O‘zbekiston qishloq xo‘jaligi va to‘qimachilik mahsulotlarini Yevropa bozorlariga faol targ‘ib qilishga ko‘maklashadi.

Shuningdek, dual ta’lim sohasida hamkorlik qilishga ham qiziqish bildirildi, xususan, Germaniyaga yuborish orqali malakali kadrlar tayyorlash loyihasini amalga oshirish bo‘yicha kelishuvga erishildi.

Bundan tashqari, xorijiy tomon joriy yilning 13-15 sentyabr kunlari Germaniya Savdo-sanoat palatasi Tashqi savdo departamenti boshlig‘i Folker Treyer boshchiligidagi Germaniya Savdo palatalari va tadbirkorlari delegatsiyalari tashrifi haqida ma’lumot berdi.

Bo‘lajak tashrifdan ko‘zlangan asosiy maqsad O‘zbekiston va Germaniya o‘rtasidagi savdo-iqtisodiy munosabatlarning bugungi holati va istiqbollari yuzasidan fikr almashish, O‘zbekistonning yetakchi korxonalari bilan uchrashuvlar tashkil etish, savdo-iqtisodiy sohada ikki tomonlama hamkorlikni yo‘lga qo‘yish yuzasidan muzokaralar olib borishdan iborat.

SSP Matbuot-xizmati