Ўзбекистон ва Ҳиндистон ўртасидаги ўзаро ҳамкорлик истиқболлари муҳокама қилинди

Жорий йилнинг 1 август куни Савдо-саноат палатаси раиси Даврон Вахабов ва Ҳиндистон Савдо-саноат палаталари федерацияси (FICCI) ҳаммуассиси Дебасмита Рой Чакраборти ўртасида видеоконференцалоқа форматида учрашув бўлиб ўтди.

FICCI Ҳиндистоннинг энг йирик олий ташкилоти бўлиб, унинг таркибига иқтисодиётнинг турли тармоқларидаги 300 мингдан ортиқ аъзолар, шунингдек, халқаро компаниялар ва минтақавий савдо палаталари киради.

Мазкур учрашувдан кўзланган асосий мақсад инвестиция, савдо-иқтисодий, илмий, таълим ва гуманитар соҳалардаги ҳамкорликни чуқурлаштиришдан иборат.

Учрашув давомида Ўзбекистон ва Ҳиндистон ўртасидаги соғлиқни сақлаш, фармацевтика, туризм, заргарлик саноати ва ахборот технологиялари каби соҳалардаги ҳамкорлик истиқболлари муҳокама қилинди.

Учрашув якунлари бўйича, инвестиция ва савдо-иқтисодий соҳалардаги ҳамкорликни кенгайтириш мақсадида жорий йилнинг октябрь ойида Тошкент шаҳрида икки давлатнинг етакчи тадбиркорлари иштирокида бизнес-форум ва B2B учрашувларни ташкил этишга келишиб олинди.

ССП Матбуот хизмати