Ўзбекистон–Россия ва Россия–Ўзбекистон ишбилармонлар кенгашининг 8-қўшма йиғилиши

Қозон шаҳрида Ўзбекистон–Россия ва Россия–Ўзбекистон ишбилармонлар кенгашининг 8-қўшма йиғилиши бўлиб ўтди. Тадбир Ўзбекистон ва Россия минтақалараро ҳамкорликнинг учинчи форуми доирасида бўлиб ўтди.

Ўзбекистон–Россия ишбилармонлар кенгаши икки мамлакат бизнес доиралари орасида ўзаро манфаатли шериклик муносабатларини ўрнатиш, қўшма инвестиция лойиҳаларини амалга ошириш, шунингдек, ҳамкорлик йўлида юзага келадиган масалаларга ечим топиш мақсадида 2005 йилда Ўзбекистон ва Россия Савдо-саноат палаталари негизида ташкил этилган.

Йиғилишда Ўзбекистон Савдо-саноат палатаси раиси ўринбосари Ж.Ураков, Россия–Ўзбекистон ишбилармонлар кенгаши раиси А.Кузяев ва бошқалар иштирок этди.

Томонлар икки томонлама ҳамкорликнинг энг долзарб ва истиқболли йўналишлари ҳақида тўхталиб, Ўзбекистон ва Россия минтақаларининг савдо-иқтисодий ва сармоявий салоҳияти ҳақида сўз юритдилар.

Учрашувда Ўзбекистон–Россия ишбилармонлар кенгашининг ўтган даврдаги фаолияти якунлари ҳамда келгуси даврдаги вазифалари, ташқи савдо ҳамкорлигининг истиқболли йўналишлари ҳамда икки мамлакат корхона ва ташкилотлари ўртасидаги тармоқлараро ҳамкорлик масалалари кўриб чиқилди.

Учрашув якунлари бўйича вазирликлар, идоралар, ҳокимликлар, шунингдек, икки мамлакат ишбилармон доираларининг 400 нафар вакили иштирокида G2B ва B2B форматидаги учрашувлар бўлиб ўтди.

ССП матбуот хизмати