Самарқанд шаҳрида Ўзбекистон-Белоруссия бизнес форуми бўлиб ўтди

Беларус Республикаси Бош вазири Роман Головченко бошчилигидаги ҳукумат делегациясининг Ўзбекистонга ташрифи доирасида жорий йил 5 декабрь куни Самарқанд шаҳрида Ўзбекистон-Белоруссия бизнес форуми ҳамда икки мамлакат ишбилармон доиралари ўртасида "Б2Б" музокаралари бўлиб ўтди.

Унда икки мамлакат ҳукуматлари аъзолари, тегишли вазирлик, идоралар, тармоқ бирлашмалари, Савдо-саноат палаталари раҳбарлари, ишбилармон доираларининг 350 дан ортиқ вакиллари иштирок этди.

Форумда Ўзбекистон Республикаси Бош вазири Абдулла Арипов ва Беларус Республикаси Бош вазири Роман Головченко иштирок этиб, сўзга чиқди.

Тадбирни ташкил этишдан кўзланган мақсад Ўзбекистон ва Белоруссия компаниялари ўртасида савдо алоқалари йўлга қўйилишини қўллаб-қувватлаш, Ўзбекистонда бизнес юритиш бўйича беларус компанияларининг тажрибаси тақдимотини ўтказиш, янги қўшма корхоналарни ташкил этиш ва янги инвестициявий лойиҳаларни амалга ошириш масалаларини кўриб чиқишдан иборат.

Айтиб ўтиш жоизки, Беларус Республикаси мамлакатимизнинг муҳим ҳамкорларидан бири саналади. Кейинги пайтда, айниқса, иқтисодий, инвестициявий муносабатлар тобора мустаҳкамланиб, ўзаро савдо алоқалари учун қулай муҳит яратилди. Натижада товар айирбошлаш ҳажми йил сайин ортмоқда. Хусусан, 2023 йил 9 оу мобайнида ўзаро савдо ҳажми 449,5 млн. АҚШ долларини, жумладан, экспорт – 101,5 млн. АҚШ долларини, импорт – 348 млн. АҚШ долларини ташкил этди.

Белоруссия юртимизда ишлаб чиқарилган текстил, янги ва қайта ишланган қишлоқ хўжалиги маҳсулотлари, шунингдек, хизматларга талаб катта бўлса, ўз навбатида, мамлакатимизга қора металл, фармацевтика маҳсулотлари, қурилиш материаллари, электротехника буюмлар етказиб берилади.

Мамлакатимизда Белоруссия Республикаси капитали иштирокида 186 корхона мавжуд, жумладан 65 та қўшма корхона ва 121 та ЯТТ. Ўз навбатида, Белоруссияда ўзбек капитали иштирокидаги 100 та корхона фаолият кўрсатмоқда.

Бизнес-форум доирасида “Б2Б” ва “Г2Б” форматларида учрашувлар бўлиб ўтди, шунингдек, тадбир якунлари бўйича бир қатор йирик савдо шартномалар имзоланди.

ССП матбуот хизмати