Қорақалпоғистонда “Ёш тадбиркорлар форуми” ташкиллаштирилди

Республикамиз ёшларини қўллаб-қувватлаш, уларнинг тадбиркорлик соҳасидаги фаоллигини янада ошириш мақсадида бугун Ўзбекистон Савдо-саноат Палатасининг Қорақалпоғистон Республикаси бошқармаси томонидан “Ёш тадбиркорлар форуми” ташкиллаштирилди.

Тадбирда Қорақалпоғистон Республикаси Жўқорғи Кенгаши Раисининг тадбиркорликни ривожлантириш бўйича маслаҳатчиси Ж.Есмурзаев, Ўзбекистон Савдо-саноат Палатасининг Қорақалпоғистон Республикаси бошқармаси бошлиғи К.Артиков, Ўзбекистон Ёшлар Ишлари Агентлиги Қорақалпоғистон Республикаси бошқармаси бошлиғининг ўринбосари М.Турсинов, бизнес фаолиятида муваффақиятга эришган ёш тадбиркорлар, ҳунармандлар ва тадбиркорликка қизиқувчан 300 дан ортиқ фаол ёшлар қатнашди.

Форум давомида ёшлар кичик бизнес учун махсус асбоб-ускуналар, Қорақалпоғистонлик тадбиркорлар ва ҳунармандлар томонидан ишлаб чиқарилган товарлар ва маҳсулотлар кўргазмасида қатнашиш имкониятига эга бўлишди.

Тадбирда ёш бўлишига қарамасдан тадбиркорлик фаолиятида ютуқларга эришган, ҳозирги кунда Республикамизда ўзларининг машҳур брендларига эга бўлган ёш бизнес вакиллари иштирокида мастер-класс ташкиллаштирилди.

Мастер-класс давомида спикерлар тадбиркорлигини қандай бошлаганлиги, фаолияти давомида қийинчиликлар ва улардан мардона ўтганлиги, бизнес оламида муваффақиятга эришиш сирлари ҳақида батафсил сўзлаб бердилар.

Аъло кайфият билан бошланган “Ёш тадбиркорлар форуми” концерт дастури билан давом этди.

ССП матбуот хизмати