"Toshkent viloyati tajriba"si amalda

O'zbekiston Respublikasi Savdo-sanoat palatasi, O'zbekiston Respublikasi Prezidenti huzuridagi tadbirkorlik sub'ektlari huquqlari va qonuniy manfaatlarini himoya qilish bo'yicha vakolatli vakili va O'zbekiston Respublikasi Markaziy bankining mas'ul xodimlari ishtirokida joriy yilning may oyi uchinchi dekadasi va iyun oyi birinchi dekadasi davomida viloyatlarda tadbirkorlik sub'ektlari faoliyatidagi muammolarni o'rganish, ularga amaliy ko'mak berish maqsadida joylarda uchrashuvlar tashkil etildi.

Qayd etish lozimki, O'zbekiston Respublikasi Prezidentining Toshkent viloyati Xalq deputatlari Kengashining 2018 yil 5 yanvardagi navbatdan tashqari sessiyasida bergan topshiriqlari ijrosini ta'minlash maqsadida tadbirkorlarning muammolarini o'rganish va bartaraf etish bo'yicha amaliy ishlar olib borilmoqda.

Viloyatlarda O'zbekiston Savdo-sanoat palatasining malakali mutaxassislari, O'zbekiston Respublikasi Prezidenti huzuridagi tadbirkorlik sub'ektlari xuquqlari va qonuniy manfaatlarini himoya qilish bo'yicha vakil hamda Markaziy bank va boshqa muassasalar bilan hamkorlikda joriy yilning 21 may kunidan 31 may kuniga qadar Qoraqalpog'iston Respublikasi, Jizzax, Qashqadaryo, Navoiy, Samarqand, Sirdaryo va Xorazm viloyatlaridagi tadbirkorlik sub'ektlari ishtirokida uchrashuvlar bo'lib o'tdi.

Unda xukumatimiz tomonidan tadbirkorlikni rivojlantirish, ularning tadbirkorlik faoliyatidagi muammolarni yechishda shahar va tuman sektorlari rahbarlarining mas'uliyatini oshirish, har bir sektor rahbari tomonidan hududdagi tadbirkorlar faoliyatida yuzaga kelayotgan muammaolar yechimini topishda amaliy yordam berish, qo'shimcha ish o'rinlari yaratish yuzasidan aniq vazifalar belgilanganligi ta'kidlab o'tildi.

Uchrashuvda tadbirkorlarga hozirda mamlakatimiz tomonidan yaratilayotgan imkoniyatlar yuzasidan axborotlar berilib, ular tomonidan ko'tarilgan masalalar va muammolar atroflicha o'rganilib, tushuntirish ishlari olib borildi.

Tadbirkorlarning faoliyatida yuzaga kelayotgan muammolarning aksariyati quyidagi sohalarda vujudga kelmoqda:

- 41,6 % bo'sh turgan bino-inshootlarni “Nol” qiymatda olish, auksion savdolarida ishtirok etish, yer ajratilishi;
- 32,2 % bank-moliya, kredit, garov ta'minoti;
- 10,6% xom-ashyo resurslarini sotib olish, birja savdolar ishtirok etish;
- 4,3% kommunikatsiya tizimiga ulanish, arxitektura va kadastr hujjatlarini rasmiylashtirish;
- 2,7 % qonunbuzarlik, mansab vazifasini suiste'mol qilish, tanish-bilishchilik, ta'magirlik va korrupsiya;
- 1,6% ruxsatnoma va litsenziyalar, noqonuniy aralashuv;
- 7,1% boshqa muammolar
Ko'tarilgan muammolarni o'z vaqtida hal etish yuzasidan zarur choralar ko'rish bo'yicha aniq vazifalar belgilab olindi.

Shu bilan birga, tajribali mutaxassislar tomonidan tadbirkorlarni qiziqtirgan barcha savollarga javob berildi, o'z navbatida tadbirkorlik faoliyatini tashkil etish, korxona ochish tartibi, raqobatbardosh mahsulot ishlab chiqarish, ichki va tashqi bozorlarga sifatli mahsulotlarni olib chiqish, eksport operatsiyalarini amalga oshirish, xorij xamkorlarni izlab topish borasida ma'lumotlar berildi.

Ushbu uchrashuvlarda 500 ortiq tadbirkorlar ishtirok etdi.

O'zSPP Matbuot xizmati