Jizzah shahrida “Yoshlar – kelajak bunyodkori” shiori ostida ko'rgazma tashkil etildi

“O'zbekiston Respublikasida yoshlarga oid davlat siyosatini amalga oshirishga qaratilgan qo'shimcha chora-tadbirlar to'g'risida”gi Yoshlar masalalari bo'yicha respublika idoralararo kengashi majlisining 2018 yil 22 yanvardagi 1-sonli yig'ilish bayoni bilan tasdiqlangan chora-tadbirlar dasturi 12-bandining ijrosini ta'minlash maqsadida, joriy yilning 6 iyun kuni Jizzah shahrida “Yoshlar – kelajak bunyodkori” shiori ostida ko'rgazma tashkil etildi.

Ko'rgazmada Jizzah viloyatida faoliyat ko'rsatayotgan yosh tadbirkorlar o'zlarining tikuvchilik, poyabzal, qurilish mahsulotlari namunalari bilan qatnashdilar. Yosh hunarmandlar esa o'zlari ishlab chiqargan milliy liboslar, yumshoq o'yinchoqlar, taqinchoqlar, chinni va sopol buyumlari, yog'ochdan yasalgan xalq hunarmandchiligi mahsulotlari, milliy tikuvchilik va kashtachilik, bosh kiyimlar, temirdan yasalgan buyumlar bilan ishtirok etdilar. Ko'rgazmada jami bo'lib, 68 nafar yosh tadbirkor, fermer, hunarmand va innovatsion loyiha mualliflari qatnashdi.

Ko'rgazma so'nggida har bir yo'nalish bo'yicha g'olib bo'lgan ishtirokchilarga tashkilotchilar tomonidan diplom, fahriy yorliq va esdalik sovg'alari topshirildi. 

O'zSSP Matbuot xizmati