Hamkorlik Memorandumi imzolandi

Joriy yilning 14 avgust kunida O'zbekiston Respublikasi Savdo-sanoat palatasi bilan Buyuk Britaniyaning Merritz LTD yuridik kompaniyasi o'rtasida o'zaro hamkorlik Memorandumini imzolash marosimi bo'lib o'tdi.

Memorandumni tuzishdan ko'zda tutilgan maqsad O'zbekiston Respublikasi Savdo-sanoat palatasi huzuridagi Xalqaro tijorat arbitraj sudi faoliyatini kengaytirishga, O'zbekistonning bu sohadagi ijobiy imidjini xalqaro maydonda ko'tarishga, nizolarni hal qilishning samarali mexanizmini yaratishga ko'maklashish bo'yicha hamkorlik qilishdan iborat.

Ta'kidlash joizki, London va Dubayda o'z bo'limlariga ega Merritz Xalqaro yuridik kompaniyasi yaqinda o'z faoliyatini Toshkent shahrida ham boshlagan. Kompaniya faoliyatining asosiy yo'nalishlari bo'lib arbitraj va nizolarni hal etish, energetika, tog'-kon va infrastruktura sohasidagi loyihalar, qurilish va ko'chmas mulk, bank ishi va moliya hisoblanadi.  

Memorandumda jumladan taraflarning birgalikda xalqaro tijorat arbitraj sudlarining arbitrlari, jahondagi yetakchi yuridik kompaniyalarning mutaxassislari ishtirokida konferensiyalar, seminarlar, taqdimotlar o'tkazishi; Xalqaro tijorat arbitraj sudini rivojlantirish konsepsiyasi, reglamenti va hujjatlarini tayyorlashi; xalqaro tashkilotlar va boshqa  donor-tashkilotlar vakillari bilan uchrashuvlar tashkil qilishi, xalqaro tijorat arbitraji faoliyatiga oid uslubiy qo'llanmalar, maqolalar chop etishi va ularni Palata veb-saytiga joylashtirishi kabi hamkorlik yo'nalishlari o'z ifodasini topgan.

Hozirgi kunda Palata tomonidan O'zbekiston Respublikasi Prezidentining 2017 yil 19 iyundagi PF-5087-son “Biznesning qonuniy manfaatlari davlat tomonidan muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar to'g'risida”gi Farmonining 11-bandi ijrosini ta'minlash bo'yicha  tasdiqlangan Rejaga asosan “Xalqaro tijorat arbitraji to'g'risida”gi Qonun loyihasi tayyorlanib, manfaatdor vazirlik va idoralar bilan kelishilgan holda Vazirlar Mahkamasiga taqdim qilingan.

Mazkur qonunning qabul qilinishi mamlakatimizga xorijiy investitsiyalarni keng jalb qilish, investorlarning huquq va qonuniy manfaatlarini himoya qilish, xalqaro maydonda O'zbekistonning bu boradagi obro'sini ko'tarish, ushbu soha uchun yetakchi mutaxassislarni tayyorlashda muhim ahamiyat kasb etadi.

Shuning uchun ham xalqaro tijorat arbitraji faoliyatini rivojlantirishga qaratilgan xorijiy mamlakatlarning yetakchi yuridik kompaniyalari bilan hamkorlik shubhasiz o'z ijobiy natijalarini beradi.

O'z SSP Matbuot xizmati