O'zbekiston Savdo-sanoat palatasida o'tkazilgan huquqiy masalalar bo'yicha Ekspert kengashi yakunlari

Mamlakatimiz Prezidentining Oliy Majlisga qilgan Murojaatnomasida berilgan topshiriqlarini bajarish borasida Savdo-sanoat palatasi tomonidan biznes xamjamiyati o'rtasida qonunbuzarliklarning oldini olish, ularni keng muhokama qilish va ta'sir choralari ko'rish borasida izchil ishlar olib borilmoqda. 

Savdo-sanoat palatasi tomonidan joriy yilning 1-yarim yilligida tadbirkorlik sub'ektlari tomonidan soliq va bojxona sohalarida sodir etilgan qonunbuzarliklar, ularning sabablari va imkon yaratgan shart-sharoitlar atroflicha tahlil qilindi.

Tahlil natijalari joriy yil 10 avgust kuni soliq va bojxona organlari, nodavlat notijorat tashkilotlari vakillari, tadbirkorlar, ekspertlar ishtirokida o'tkazilgan huquqiy masalalar bo'yicha Ekspert kengashi yig'ilishida atroflicha muhokama qilindi hamda ularni bartaraf etish va profilaktika qilish bo'yicha zarur tavsiyalar ishlab chiqildi. 

Yig'ilish davomida Palata Raisining birinchi o'rinbosari I.Jasimov quyidagilarni alohida ta'kidlab o'tdi: 
“Bugungi kunda O'zbekiston jahonga ochildi, biznes-muxitni yaxshilash bo'yicha mustaxkam huqukiy poydevor yaratilmoqda, xorijiy investitsiyalar jalb qilinmoqda. Mazkur investitsiyalar to'g'ri va to'lik o'zlashtirilishi, mamlakatimiz jahon xamjamiyatida o'zining munosib o'rnini egallashini ta'minlash uchun biznes xamjamiyati o'rtasida qonunbuzarliklar, birinchi navbatda jinoyatlar sodir etilishini oldini olish zarur va biznes bunday illatdan xoli bo'lishi shart.”

O'z so'zi davomida I.Jasimov davlat va tadbirkorlar o'rtasidagi munosabatlarga aloxida e'tibor qaratdi, ya'ni, ayrim xolatlarda tadbirkorning o'zi o'z maqsadlariga erishish uchun davlat organlari vakillari bilan noqonuniy aloqalarga kirishadi, davlat organlari vakillariga yo'l qidiradi.

Davlat soliq va bojxona qo'mitalari mas'ul xodimlari tomonidan joriy yilning 1-yarim yarim yilligida aniqlangan qonunbuzarliklar, ularning turlari, javobgarlikka tortilgan shaxslar to'g'risida axborot berildi hamda ularning oldini olish maqsadida qonunchilikka o'zgartish va qo'shimchalar kiritish bo'yicha takliflar kiritildi.
Shundan so'ng kun tartibidagi masala yuzasidan muzokaralar bo'lib o'tdi va ushbu jarayonda tadbirkorlar o'zlarini qiziqtirgan savollarga atroflicha va mazmunli javoblar olishdi.

Ekspert kengashi yakuni bo'yicha mazkur sohalarda sodir etilayotgan qonunbuzarliklarning asosiy sabablari keltirib o'tildi, ya'ni:
- mazkur sohalarda qonun talablari va qonunlarga kiritilayotgan o'zgartirishlar hamda qo'shimchalardan tadbirkorlar yetarli darajada xabardor emasligi;
-  soliq va bojxona sohalarida sodir etilayotgan qonunbuzarliklarning oldini olish va profilaktika ishlarida izchillik va tizimlilik yetishmasligi, tadbirlar ko'pincha qonuniylik ahvoliga asoslanmaganligi va ular qonunbuzilishlar sabablarini bartaraf etishga aniq yo'naltirilmaganligi;
- soliq va bojxona organlarining ayrim xodimlari tomonidan o'z vazifalarini bajarishda mas'uliyatsizlik va suiiste'molchilik xolatlariga yo'l qo'yilishi oqibatida tadbirkorlarning qonuniy manfaatlari buzilishiga shart-sharoit yaratilishi;
- soliq va bojxona organlari xodimlari tadbirkorlar bilan korrupsion munosabatlarga kirishiga sabab bo'layotgan shart-sharoitlar to'liq bartaraf etilmaganligi. 

Mazkur ekspert kengashi yig'ilishi bayoni e'tiboringiz uchun xavola etilayotgan bo'lib, Palata bayonda keltirilgan fikr-muloxazalar va berilgan tavsiyalar nafaqat tadbirkorlar, balki barcha mutasaddi davlat va nodavlat notijorat organlari xodimlari uchun qiziqarli, foydali va kerakli ma'lumot bo'lib xizmat qiladi, degan umid bildiradi.      

Yuklab olish Ekspert kengashi bayoni.pdf

O'z SSP Matbuot xizmati