O'zbekistonda birinchi innovatsion klinika ochildi

Mazkur klinikada O'zbekistonda ilk bora biologik tiklovchi aloqa yordamida dorilardan foydalanmagan holda neyrofiziologik reabilitatsiya usuli joriy etildi. Bunda organizmdagi funksional buzilishlar aniqlanib, bemor stress holatidan chiqariladi. Uning nutqi tiklanadi, tungi enurez va boshqa salbiy holatlarga barham beriladi.

Ko'z to'rpardasi kasalliklarini tashxis qilish va davolashning innovatsion usullari va texnologiyalarini qo'llash orqali yurtimizda ilk bor mikroinvaziv jarrohlik amaliyoti o'tkazildi. Avvallari bunday amaliyot uchun xorijga borishga to'g'ri kelardi.

“Ko'p yillardan buyon har tomonlama zamonaviy, murakkab jarrohlik amaliyotlarini amalga oshirsa bo'ladigan klinika ochish orzusida yurgandim. Negaki, hamyurtlarimiz ko'zlarini uzoq davlatlarga borib davolatib kelishardi. Endi ko'z kasalliklarini davolatish uchun Germaniya, Hindistonga borish shart emas”, – dedi "Doktor Maqsudova" innovatsion klinikasi asoschisi va rahbari Zulfiya Maqsudova.

Shuningdek, klinikada “Og'riq xonasi” – og'riq sindromlarini tashxislash va davolash xonasi mavjud. Ushbu yo'nalish mutaxassisining vazifasi qisqa muddatda bemorning og'rig'ini olish, uni ijtimoiy safga qaytarish va keyingi terapiyaga to'g'ri yo'naltirishdan iborat.

8 oktyabr kuni Maqsudova klinikasi hamda Innovatsion rivojlanish vazirligi o'rtasida hamkorlik memorandumi imzolangan. Sog'liqni saqlash tizimiga xalqaro standartlarni, davolashning zamonaviy usullarini ishlab chiqish va joriy etish memorandumning asosiy maqsadi qilib belgilangan.

Mutasaddilarning ta'kidlashicha, Innovatsion rivojlanish vazirligi va "Doktor Maqsudova" innovatsion klinikasining hamkorligi natijasida o'zbekistonlik shifokorlar davolashning innovatsion usullari va texnologiyalaridan foydalanish bo'yicha malaka oshirish imkoniga ega bo'ladilar.

O'z SSP Axborot hizmati  t.me/uzchamber