Mediatsiyani rivojlantirish istiqbollari

Bishkek shahrida “Zamonaviy tahdidlar va mediatsiyani rivojlantirish istiqbollari: institutsional yechim va amaliyot” mavzusida Qirg'iziston Respublikasi mediatorlar respublika hamjamiyatining birinchi xalqaro konferensiyasi bo'lib o'tdi.

Konferensiyadan ko'zlangan maqsad mediatsiyaning nizolarni muqobil hal qilish mexanizmi sifatidagi o'rni va rolini bir xilda tushunish uchun sud tizimi, huquqni muhofaza qiluvchi organlar va advokatlar hamjamiyati bilan muloqatni rivojlantirish, bu borada xorijiy tajribani o'rganishdan iborat bo'ldi.

Konferensiyada Qirg'iziston Respublikasi Prezidenti devoni mas'ul xodimi, Jogoru Keneshi Toragasining o'rinbosari, Oliy sudi raisining o'rinbosari, Adliya vazirining o'rinbosari, Intellektual mulk va innovatsiya davlat xizmati raisi,  BMT  dasturining Qirg'iziston Respublikasidagi doimiy vakili vazifasini bajaruvchisi,  “Markaziy Osiyo mamlakatlarida huquqiy davlatchilikka ko'maklashish” GIZ dasturi milliy muvofiqlashtiruvchisi tabrik so'zi bilan ishtirok etdilar, shuningdek unda Angliya, Belorussiya, Germaniya,  Qozog'iston, Qirg'iziston, Latviya, Rossiya, Tojikiston,  O'zbekiston, Finlandiyalik mediatsiya sohasidagi xalqaro va milliy ekspertlar, mediatorlar, adliya vazirligi va boshqa davlat organlari vakillari, fuqarolik, jinoyat va iqtisodiy sudlarning sudyalari, mediatsiya sohasida ilmiy tadqiqotlar olib borayotgan olimlar, advokatlar ishtirok etdilar.

Xalqaro konferensiyaning yalpi majlislarida - Qirg'iziston Respublikasi Oliy sudi raisining o'rinbosari Nurgul Asanova, Ural davlat yuridik universiteti Mediatsiya markazi direktori, yu.f.d, prof. Svetlana Zagaynova, Qirg'iziston Respublikasi mediatorlar respublika hamjamiyati boshqaruvi raisi Gulsina Kojoyarova, Qirg'iziston Respublikasi Hukumati apparati sektor mudiri Yegor Skobeev, Germaniyalik mediator Manfred Shtender, Xelsinki universitetining tadqiqotlar bo'yicha direktori, mediator Kayvis Ervasti,  Riga shahar jinoiy mediatsiya bo'yicha ishlar muvofiqlashtiruchisi, mediator Ivete Darznitse, Angliyalik mediator Chinara Devis, Qozog'iston mediatorlar assotsiatsiyasi bosh direktori Jandilda Jakupov mediatsiyaning turli jihatlari, mavjud muammolar, ularning yechimlari, mediatsiyani qo'llash usullari, mediatorlarni tayyorlash masalalariga oid mavzularda ma'ruza qildilar.

Konferensiyada O'zbekiston Savdo-sanoat palatasi huzuridagi Hakamlik sudining raisi, yuridik fanlari nomzodi, dotsent Foziljon Otaxonov “O'zbekistonda mediatsiyaning huquqiy asoslari va rivojlanish istiqbollari” mavzusida ma'ruza qildi. U o'z ma'ruzasida Markaziy Osiyo mamlakatlarida mediatsiyani qo'llanish tarixi va an'analari, O'zbekiston Respublikasining 2018 yil 3 iyulda qabul qilingan va 2019 yil 1 yanavardan kuchga kiradigan “Mediatsiya to'g'risida”gi Qonunning mazmun va mohiyatiga to'xtaldi, jamiyatning hozirgi rivojlanish davrida mediatsiyani joriy qilishning dolzarb muoammolariga xalqaro konferensiya ishtirokchilari e'tiborini qaratdi hamda mediatsiya sohasida xalqaro hamkorlikni yo'lga qo'yish bo'yicha o'z takliflarini bildirdi.

Xalqaro konferensiyaning seksiyalaridagi majlislari jonli va qizirqarli, savol-javoblarga boy bo'lib, ularda fuqarolik va jinoyat protsesslarida hamda oilaviy munosabatlardan kelib chiqadigan nizolarni hal qilishda mediatsiyaning roli muhokama qilindi, konferensiya tavsiyalariga kiritish uchun takliflar tayyorlandi. 

Konferensiya doirasida Artur Trossen, Chinara Devis, Kayvis Ervasti, Iveta Darznitse mediatsiyaning turli yo'nalishlari bo'yicha master-klass  o'tkazdilar va uning yakuni bo'yicha yuzga yaqin ishtirokchilarga malaka oshirganlik Sertifikatlari topshirildi. 

Ikki kunlik xalqaro konferensiya yakunlari bo'yicha Markaziy Osiyo mamlakatlarida mediatsiyani yanada rivojlantirish, mediatsiyaning huquqiy va institutsiyaviy asoslarini takomillashtirish, mediatorlarning xalqaro hamjamiyatini tashkil qilish va boshqa masalalar bo'yicha tavsiyalar ishlab chiqildi.
 

O'zb SSP Matbuot hizmati