O'z SSP da “Hakamlik sudlari: amaliyot va nazariya” mavzusida davra suhbati tashkil qilindi.

O'zbekiston Respublikasi Savdo-sanoat palatasi va Toshkent davlat yuridik universiteti huzuridagi Yuridik kadrlarni xalqaro standartlar bo'yicha professional o'qitish markazi tomonidan 2019 yilning 15 aprel kuni “Hakamlik sudlari: amaliyot va nazariya” mavzusida davra suhbati tashkil qilindi.

Davra suhbatida markazning va yuridik ta'lim muassasalarining professor-o'qituvchilari ishtirok etdilar.

O'zbekiston Respublikasi Savdo-sanoat palatasi huzuridagi Hakamlik sudining raisi, yu.f.n., dots. Foziljon Otaxonov o'z ma'ruzasida 2017-2021 yillarda O'zbekiston Respublikasini rivojlantirishning beshta ustuvor yo'nalishi bo'yicha Harakatlar strategiyasida belgilangan vazifalarni ijro etish, xususiy mulkchilik va tadbirkorlik sub'ektlarining huquqlari va qonuniy manfaatlarini ishonchli muhofaza qilish kafolatlarini kuchaytirishda Hakamlik sudlari o'rni, Palata va uning hududiy boshqarmalari huzuridagi Hakamlik sudlarining faoliyati to'g'risida batafsil to'xtaldi hamda ular tomonidan ko'rib hal qilinayotgan ishlar soni yildan yilga ko'payib borayotganligini ta'kidladi. Xususan, Hakamlik sudlari tomonidan 2018 yilda 6847 ta ishlar ko'rilgan bo'lib, da'vo summasi 167,8 mlrd. so'm, 6,9 mln AQSH dollarini tashkil qilgan. Bu 2017 yilda ko'rilgan ishlar soniga nisbatan 4382 taga, 2016 yilga nisbatan esa - 5586 taga ko'pdir.

“Davra suhbati” kun tartibidagi masalalar savol-javoblar asosida har tomonlanma muhokama qilindi. Jumladan, hakamlik sudlarining ommalashuviga to'siq bo'layotgan muammolar va ularni yechimi, hakamlik sudlari hal qiluv qarorlarini bekor qilish va ijro varaqalari berish bilan bog'liq ishlarni vakolatli sudlar tomonidan ko'rishning o'ziga xos hususiyatlari, hakamlik sudlarining huquqiy asoslari takomillashtirish, hakamlik muhokamasining nazariy jihatlarini ilmiy tadqiq qilish hamda ushbu mavzusi bo'yicha amaliy mashg'ulotlar olib borish kabi masalalar  batafsil  muhokama qilindi. 

O'z SSP Axborot hizmati