O'zbekiston – Fransiya biznes-forumi bo'lib o'tdi.

“MEDEF International” Fransiya tadbirkorlari harakati raisi Kristof Fonten boshchiligidagi delegatsiyaning mamlakatimizga tashrifi doirasida 15 may kuni Xalqaro hamkorlik markazida O'zbekiston – Fransiya biznes-forumi bo'lib o'tdi.

O'zbekiston Respublikasi Investitsiyalar va tashqi savdo vazirligi bilan “MEDEF International” Fransiya tadbirkorlari harakati tomonidan, Fransiyaning O'zbekistondagi elchixonasi ko'magida tashkil etilgan tadbirda ikki mamlakatning savdo, investitsiya, bank-moliya, turizm, qurilish, kimyo sanoati, energetika, yengil sanoat, qishloq xo'jaligi, farmatsevtika kabi sohalar uchun mas'ul vazirlik va idoralari, kompaniya rahbarlari ishtirok etdi.

O'zbekiston Respublikasi investitsiyalar va tashqi savdo vaziri Sardor Umurzoqov, “MEDEF International” Fransiya tadbirkorlari harakati raisi Kristof Fonten va boshqalar mamlakatlarimiz o'rtasidagi faol hamkorlik 1992 yildan buyon rivojlanib kelayotganini mamnuniyat bilan qayd etdi. Prezident Shavkat Mirziyoevning Fransiyaga tashrifi yakuni bo'yicha erishilgan kelishuv va imzolangan bitimlar ushbu sheriklik munosabatlarini sifat jihatdan yangi bosqichga olib chiqish imkonini bergani ta'kidlandi.

Prezidentimiz Shavkat Mirziyoevning Fransiyaga tashrifi doirasida O'zbekistonning tegishli vazirlik va idoralari tomonidan Yevropa tiklanish va taraqqiyot banki, “MEDEF International” Fransiya tadbirkorlari harakati hamkorligida biznes-forum ham tashkil etilgandi. Forum yakuni bo'yicha Yevropaning ilg'or tajribasi, bilimi va texnologiyalari asosida istiqbolli loyihalarni amalga oshirish bo'yicha kelishuvlarga erishilgan, xususan, Fransiya taraqqiyot agentligi bilan umumiy qiymati qariyb 600 million yevro bo'lgan infratuzilma loyihalarini amalga oshirish bo'yicha hamkorlik dasturi imzolangandi.

– Bugungi tashrifimiz mamlakatlarimiz biznes doira vakillari ishtirokida Fransiyada o'tgan amaliy muloqotning mantiqiy davomi sifatida tashkil etildi, – deydi K.Fonten. – Mazkur biznes-forumda O'zbekistonda ishbilarmonlik muhitini yanada yaxshilash jarayonida Fransiyaning bevosita ishtirokini ta'minlash, shuningdek, fransiyalik ishlab chiqaruvchilarning mamlakatingiz ichki bozoriga investitsiya kiritishi bilan bog'liq masalalar yuzasidan fikr almashdik.

Forum doirasida mehmonlarga O'zbekistonda biznes yuritish uchun yaratilayotgan imkoniyat va qulayliklar, mamlakatimizdagi erkin iqtisodiy zonalar, soliq va bojxona imtiyozlari haqida so'zlab berildi. Fransiya ishbilarmonlari mamlakatimizda o'tkazilishi rejalashtirilgan Xalqaro investitsiya forumida ishtirok etishga taklif etildi.

Bugungi kunda mamlakatlarimiz o'rtasida turli sohalardagi, xususan, avtomobil sanoati, meva-sabzavot va poliz ekinlari, qattiq va maishiy chiqindilarni qayta ishlash kabi yo'nalishlardagi hamkorlik rivojlanib bormoqda. Mamlakatimizda Fransiya fuqarolari uchun 90 kungacha vizasiz tartib joriy etilgani sayyohlik sohasidagi munosabatlarda yangi ufqlar ochmoqda. Joriy yilning yanvar-aprel oylari davomida mamlakatimizga kelgan fransiyalik sayyohlar oqimi 40 foizga ortgani ham fikrimizga misol bo'ladi.

– Fransiya O'zbekistonning Yevropa Ittifoqidagi muhim savdo sheriklaridan, – deydi mamlakatimizning Fransiyadagi Favqulodda va muxtor elchisi Sardor Rustamboev. – 2018 yilning oktyabr oyidan buyon hamkorlikda 20 ta tadbir o'tkazildi, fransiyalik hamkorlarning Jizzax va Namangan viloyatlariga, shuningdek, Buxoro viloyati hokimligi vakillarining Parij shahriga tashriflari amalga oshirildi. Bu o'zaro manfaatli sheriklik aloqalarini har tomonlama rivojlantirishga xizmat qilmoqda.

Anjumanda Investitsiyalar va tashqi savdo, Energetika vazirliklari, Turizmni rivojlantirish davlat qo'mitasi vakillari tomonidan mamlakatimizning investitsion salohiyati, hamkorlik yo'nalishlari, ko'zda tutilayotgan istiqbolli loyihalarga doir taqdimotlari namoyish etildi. Fransiyaning "ADEO", "Airbus", "Alstom", "Lazard Freres", "Bouygues", "BPI France", "Catering International Services", "EGIS", "IDEMIA" kabi 20 dan ziyod kompaniyalari vakillari tomonidan taklif etilayotgan biznes rejalar ko'rib chiqildi.

Ta'kidlanganidek, mamlakatlarimizda qishloq xo'jaligi, bog'dorchilik, yengil sanoat kabi istiqbolli sohalar bo'yicha hamkorlik munosabatlarini rivojlantirish uchun yuqori salohiyat mavjud. Farmatsevtika, kimyo sanoati, shuningdek, iqtisodiyotning turli sektorlariga innovatsion dasturiy ishlanmalarni joriy etish, infratuzilmani rivojlantirishdagi sheriklik hamkorlikdagi istiqbolli yo'nalishlar hisoblanadi.

Kunning ikkinchi yarmida ikki tomonlama hamkorlikni rivojlantirishga qaratilgan “G2B” va “B2B” shaklidagi muzokaralar tashkil etildi. Uning doirasida o'zaro manfaatli kelishuvlarga erishildi.

www.uza.uz