Bugun, O'zbekiston Savdo-sanoat palatasida videoselektor shaklida “Davra suhbati” tashkil etildi.

2019 yil 24 may kuni Savdo-sanoat palatasi tomonidan O'zbekiston Respublikasi Prezidenti huzuridagi Tadbirkorlik sub'ektlarining huquqlari va qonuniy manfaatlarini himoya qilish bo'yicha vakil (Biznes Ombudsman), Vazirlar Mahkamasining ma'sul xodimlari, Davlat xizmatlari agentligi, Tadbirkorlik faoliyati asoslariga o'qitish respublika markazi, tijorat banklari va ularning hududiy bo'linmalari hamda Qoraqalpog'iston Respublikasi Vazirlar Kengashi raisi va viloyat hokimlarining 1-o'rinbosarlari ishtirokida videoselektor shaklida “Davra suhbati” o'tkazildi.

O'zbekiston Respublikasi Savdo-sanoat palatasi va tegishli davlat idoralari tomonidan davlat dasturlarining joylardagi ijro holati hamda hududlarda tadbirkorlik faoliyatini yuritishda yuzaga kelayotgan muammolarni aniqlash, ularni bartaraf etish borasida O'zbekiston Respublikasi Prezidenti va Hukumati tomonidan belgilab berilgan vazifalar amalga oshirilmoqda.

Xususan, O'zbekiston Respublikasi Prezidentining joriy yil 14 maydagi PF-5718-sonli “Tadbirkorlik faoliyatini qo'llab-quvvatlash va himoya qilish tizimini tubdan takomillashtirish chora-tadbirlari to'g'risida”gi Farmoniga asosan, joylarda O'zbekiston Respublikasi Bosh Vaziri qabulxonalari faoliyatini samarali tashkil etish chora-tadbirlari belgilab olindi. Jumladan,

• joylardagi Bosh Vazir qabulxonalarini bino va moddiy-texnikalar bilan ta'minlash;
• qabulxonalarga yetuk kadrlarni jalb etish;
• yagona interaktiv portalini (business.gov.uz) tashkil etish va boshqa masalalar muhokama qilindi.

Bundan tashqari, yig'ilishda Prezident Farmonida Bosh Vazir qabulxonasining joylarda faoliyat olib borishni tashkillashtirish bo'yicha tashkil etilgan Respublika ishchi guruhining grafik asosida joylarga chiqqan holda Farmon mazmun-mohiyati bo'yicha targ'ibot va tashviqot ishlarini olib boradilar.

Shuningdek, “Har bir oila – tadbirkor” dasturi doirasida imtiyozli kredit olib, biznesini tashkil etish istagini bildirgan tashabbuskorlarga qulaylik yaratish maqsadida doimiy faoliyat olib boruvchi minitexnologiyalar ko'rgazmalarining tashkil etilganlik holati, uyma-uy xatlov o'tkazgan holda biznes bilan shug'ullanish istagini bildirgan tashabbuskorlarni aniqlash, kreditlarning ajratilganlik darajasi tanqidiy ko'rib chiqildi.

Joylarda aholini minitexnologiya bilan tanishtirish bilan cheklanib qolmasdan, ularni o'rnatish, ishlatish bo'yicha o'qitish, kamida bir yil davomida minitexnlogiyalarda texnik kuzatuvlarni tashkil etish xizmatini joriy etish topshirig'i berildi.

Prezidentimiz tomonidan 2018 yil noyabr oyida o'tkazilgan yig'ilishida 2019 yilda kichik biznes sub'ektlari sonini 2018 yilga nisbatan 2 barobarga oshirishni tashkil etish bo'yicha bergan topshiriqlari ijro holati tuman (shahar)lar kesimida ko'rib chiqildi.

Xususan, 2019 yil uchun reja 106 753 ta qilib belgilangan bo'lib, joriy yil o'tgan 5 oy uchun reja 44 832 tani tashkil etadi. 23 may holatiga respublikamiz bo'yicha jami 44 832 ta kichik biznes sub'ektlari yangidan ro'yxatdan o'tib, reja ijrosi 110 foizga yoki 2018 yil davomida tashkil etilgan tadbirkorlik sub'ektlari soniga deyarli teng bo'lganligi qayd qilindi.

Shu bilan birga, reja ijrosi barcha viloyatlarda bajarilib kelinayotgan bo'lsada, respublikamizning 55 ta tuman (shahar)larida reja ijrosini ta'minlashda sustkashlikka yo'l qo'yilayotganligi alohida ta'kidlab o'tildi. Kelgusida shu kabi holatlarni bartaraf qilish yuzasidan hududiy Ishchi guruh rahbarlariga ko'rsatmalar berildi.

O'z SSP Axborot xizmati