O‘zbekiston bank tizimi salohiyatining taqdimoti

“O‘zko‘rgazmasavdo” markazida bank texnologiyalari, asbob-uskunalari va xizmatlari “BankEXPO – 2016” milliy ko‘rgazmasi boshlandi. 

Tadbir O‘zbekiston Respublikasi Markaziy banki tomonidan Oliy Majlis Qonunchilik palatasining Byudjet va iqtisodiy islohotlar hamda Axborot va kommunikatsiya texnologiyalari masalalari qo‘mitalari, O‘zbekiston Banklar assotsiatsiyasi, “Kamolot” yoshlar ijtimoiy harakati ko‘magida tashkil etildi. 

Prezidentimiz rahnamoligida bank tizimini tubdan isloh etish va yanada erkinlashtirish borasida amalga oshirilayotgan izchil ishlar samarasida banklarning kapitallashuv darajasi yuksalib, investitsion faolligi kengayib borayotir. Masalan, 2015-yilda bank tizimining jami kapitali 2014-yilga nisbatan 23,3 foiz ko‘payib, 7,8 trillion so‘mga yetdi. So‘nggi 5-yilda bu ko‘rsatkich 2,4 barobar o‘sdi. Mamlakatimiz bank tizimi kapitalining yetarlilik darajasi qariyb 24 foizni tashkil qiladi va bu umumqabul qilingan xalqaro standartlardan 3-marta, likvidlik darajasi esa eng yuqori indikator ko‘rsatkichlardan 2-marta ko‘pdir. 

O‘zbekiston Respublikasi Markaziy banki raisining o‘rinbosari A.Haydarov, Banklar assotsiatsiyasi raisi S.Abdullayev bugungi kunda mamlakatimizda 26 bank va ularning 800 dan ortiq filial va bo‘limlari samarali faoliyat ko‘rsatayotganini ta’kidladi. So‘nggi yillarda ushbu muassasalar tomonidan bozor stavkalari bo‘yicha turli depozitlar joriy etildi, plastik kartalar orqali hisob-kitob tizimi rivojlanmoqda. 

«BankExpo – 2016» ko‘rgazmasida bank-moliya sektoridagi yangi texnologiya va xizmatlarni namoyish etayotgan tijorat banklari, yetakchi sug‘urta, lizing va investitsiya kompaniyalari, moliya muassasalari uchun IT mahsulotlar ishlab chiqish bilan shug‘ullanadigan kompaniyalar ishtirok etayotir. 

“Asaka” davlat-aksiyadorlik tijorat banki stendi gavjum. Mamlakatimiz iqtisodiy hayotining barcha ishtirokchilari bilan hamkorlik qilishga intilayotgan mazkur bank mulkchilik shakli va faoliyatidan qat’i nazar, barcha xo‘jalik subyektlari, shuningdek, aholi ijtimoiy qatlamlarining turli talablariga javob berish vazifasini o‘z oldiga qo‘ymoqda. Ko‘rgazmada bank plastik kartalar, lizing, ta’lim kreditlari, omonatlar bo‘yicha xizmatlarni namoyish etmoqda, tadbirkorlarga investitsiya loyihalarini hayotga tatbiq etish uchun xorijiy liniyalar bo‘yicha kreditlar taklif qilmoqda. 

“O‘zsanoatqurilishbank” aksiyadorlik tijorat banki ham jismoniy va yuridik shaxslarga keng turdagi xizmatlar taklif etayotir. Ko‘rgazmada ushbu moliya instituti mutaxassislari zamonaviy texnologiyalardan foydalangan holda mavjud imkoniyatlar haqida so‘zlab bermoqda. «Bank-mijoz», «Korporativ internet-banking», «Shaxsiy kabinet», «SMS-banking», «Mobil banking», «Mobil kommunal inspektor», «Call-markaz» shular jumlasidandir. 

– Shu oydan omonat operatsiyalarini amalga oshirishda omonatchilarni biometrik identifikatsiyalash tizimini joriy etdik va bu aholi omonatlarini himoya qilishni kafolatlaydi, – deydi “O‘zsanoatqurilishbank” aksiyadorlik tijorat bankining bo‘lim boshlig‘i Sh.Gulto‘rayev. – Mazkur tizim hisobraqam egasining ishtirokisiz omonat operatsiyalarini amalga oshirishni istisno etadi. Ko‘rgazmada taqdim etilgan maxsus monitor orqali mijozlarimiz real vaqt rejimida ular omonatlari bo‘yicha amalga oshiriladigan operatsiyalar bilan tanishishi mumkin. 

Ko‘rgazmada to‘qqizinchi marta ishtirok etayotgan «Aloqabank» aksiyadorlik tijorat banki aholining kreditlardan foydalanish darajasini oshirish, ularni qaytarishning turli usullarini taklif qilmoqda. Bundan tashqari, bank mamlakatimizga ilg‘or texnologiyalarni jalb etish, korxonalarni modernizatsiya qilish va texnik qayta jihozlashga yo‘naltirilgan investitsiya loyihasi hamda dasturlarini moliyalashtirmoqda. 

– Biz interfaol xizmatlarni ommalashtirishga alohida e’tibor qaratmoqdamiz, – deydi “Aloqabank” raisining o‘rinbosari X.Rahmatov. – Bugungi kunda xizmatlarimiz soni o‘ndan oshdi. Masalan, «CLICK» mas’uliyati cheklangan jamiyati bilan hamkorlikda plastik kartalar egalariga turli xizmatlarni «CLICK» tizimi orqali real vaqt rejimida to‘lash imkoniyati taqdim etilgan. Shu bilan birga, mijozlarimizga bankdagi hisobraqamni mobil telefon orqali masofadan turib boshqarish xizmatini taklif etmoqdamiz. 

Shuningdek, ko‘rgazmada tadbirkorlikni, xususan, kasb-hunar kollejlari bitiruvchilarining biznes-rejasini qo‘llab-quvvatlashda banklar bilan keng hamkorlik qilib kelayotgan O‘zbekiston Savdo-sanoat palatasi, “Tadbirkor ayol”, “Hunarmand” uyushmalari va boshqa bir qator tashkilotlar o‘z xizmatlarini namoyish qilmoqda. Sug‘urta kompaniyalari ham zamonaviy xizmatlar taklif etayotir. 

Ko‘rgazma yakunida tijorat banklarining kichik biznes va xususiy tadbirkorlik subyektlari, yosh tadbirkorlar loyihalarini qo‘llab-quvvatlash bo‘yicha o‘tkazilgan tanlovlar g‘oliblari e’lon qilinadi. Ularga imtiyozli kredit olish uchun sertifikatlar topshiriladi. 

Mehribon Mametova, O‘zA