SSP raisi Germaniya iqtisodiyotining Markaziy Osiyodagi vakolatxonasi rahbari bilan uchrashdi

Bugun, 11 fevral kuni Savdo-sanoat palatasi raisi A.Ikromov  Germaniya iqtisodiyotining Markaziy Osiyodagi vakolatxonasi rahbari X.Voskanyan bilan uchrashdi.

Uchrashuv davomida SSP rahbari Savdo-sanoat palatasining faoliyati shuningdek, O‘zbekistonda investisiya muhitini yaxshilash, iqtisodiyotni liberallashtirish, tadbirkorlar va investorlarning qonuniy huquqlari va manfaatlarini himoya qilishni ta'minlash borasida olib borilayotgan islohotlar to‘g‘risida ma'lumot berdi.

Germaniya iqtisodiyotining Markaziy Osiyodagi vakolatxonasi rahbari X.Voskanyan O‘zbekistonga tashrifidan ko‘zlangan maqsad - kelgusi ikki tomonlama savdo-iqtisodiy va sarmoyaviy hamkorlik masalalarini muhokama qilish, qo‘shma tadbirlarni, shu jumladan Germaniya va O‘zbekiston Respublikasi ishbilarmon doiralari vakillarining tashrifini tashkil etish ekanligini ta'kidladi.

Tomonlar, shuningdek, savdo-iqtisodiy va sarmoyaviy sohalardagi ikki tomonlama hamkorlikning rivojlanish tendensiyalarini alohida qayd etishdi. Ta'kidlash kerakki, 2019 yilda o‘zaro tovar aylanmasi hajmi 980 million AQSh dollarini tashkil etdi va bu 2018 yilgi ko‘rsatkichlardan 26 foizga ko‘payganini ko‘rsatadi. 

Muzokaralar chog‘ida tomonlar O‘zbekiston Respublikasi Prezidenti Shavkat Mirziyoevning Germaniyaga davlat tashrifi arafasida, 2019 yil 14 yanvar kuni Berlinda bo‘lib o‘tgan O‘zbekiston-Germaniya biznes-forumi natijalarini ham muhokama qildilar.

Bunday hamkorlik mamlakatlar va kompaniyalar o‘rtasida ikki tomonlama munosabatlarni rivojlantirish uchun yangi imkoniyatlar ochishi ta'kidlandi. Markaziy Osiyodagi Germaniya iqtisodiyoti vakolatxonasining vakili O‘zbekistonning ulkan iqtisodiy salohiyati ikki mamlakat o‘rtasida yaqin aloqalarni rivojlantirishga asos bo‘lishini ta'kidladi. Tomonlar o‘z navbatida uchrashuv davomida,  Toshkentda Germaniya iqtisodiyoti vakolatxonasini ochish masalasini ham muhokama qilib, aniq chora-tadbirlarni belgilab oldilar. 

SSP Matbuot xizmati