O‘zbekiston Savdo-sanoat palatasi tashabbusi bilan Toshkent shahrida Turkiyaning Iqtisodiyot va texnologiyalar universiteti filiali tashkil etildi

Ma'lumki, O‘zbekiston Respublikasi Prezidenti Shavkat Mirziyoev joriy yilning 19-20 fevral kunlari Turkiya Respublikasiga rasmiy tashrifi doirasida, 19 fevral kuni Anqara shahrida o‘tkazilgan oliy darajadagi O‘zbekiston - Turkiya birinchi strategik hamkorlik yig‘ilishi bo‘lib o‘tdi.

Mazkur tadbirda ikki davlat o‘rtasidagi savdo-iqtisodiy aloqalar bo‘yicha qator kelishuvlar imzolandi. Xususan, O‘zbekiston Savdo-sanoat palatasi va Turkiya Savdo-sanoat palatalari va birjalar ittifoqi tomonidan Toshkent shahrida Turkiya Savdo-sanoat palatalari va birjalar ittifoqining (TOВВ) Iqtisodiyot va texnologiyalar universiteti filialini ochish yuzasidan Memorandum imzolandi.

Mazkur erishilgan kelishuvlarni amalga oshirish maqsadida Vazirlar Mahkamasining 2020 yil 17 iyunda “Toshkent shahrida Turkiyaning Iqtisodiyot va texnologiyalar universiteti filialini tashkil etish chora-tadbirlari to‘g‘risida”gi 389-son qarori qabul qilindi.

Shu o‘rinda Turkiya Savdo-sanoat palatalari va birjalar ittifoqi Universiteti (TOBB ETU) haqida qisqacha ma'lumot taqdim etamiz.

Turkiya Savdo-sanoat palatalari va birjalar ittifoqi (Turkcha nomlanishi: Turkiya Odalar va Borsalar Birligi) qisqartmasi TOBB -  bu Turkiyaning barcha mintaqaviy savdo, sanoat va dengiz savdo palatalari hamda tovar birjalari konfederatsiyalarining birlashgan uyushmasidir.

Tashkilot 1950 yil 8 martda Anqarada Turkiya iqtisodiyotida xususiy sektorning eng yuqori vakillik organi bo‘lgan nodavlat tashkiloti sifatida tashkil etilgan.

TOBB ETU universiteti 2002 yilda Anqara shahrida tashkil etilgan va universitetni tashkil etish to‘g‘risidagi qonun 2003 yilda Turkiya Buyuk Millat Majlisida qabul qilingan.

Universitet o‘z faoliyatini 2004 yilda boshlagan bo‘lib, unda 3 ta fakultet (muhandislik, iqtisodiy va ma'muriy fanlar, tabiiy fanlar va adabiyot) tashkil etilib, 10 ta kafedra birinchi talabalarni qabul qilgan. Keyinchalik, Tasviriy san'at va dizayn fakulteti (2007 yil), Yuridik fakulteti (2009) va tibbiyot fakultetlari (2010) tashkil etilgan va talabalarni qabul qilishni boshlagan.

Hozirgi kunda, universitetda 9 ta fakultet, 19 ta kafedra va 2 ta institut (Tabiiy va amaliy fanlar instituti va Ijtimoiy fanlar instituti) mavjud.

Universitet professor o‘qituvchilari kuchli, o‘ziga xos va umumbashariy bilimlarni ishlab chiqadi hamda tadbirkorlik sohasi uchun yetuk mutaxassislar tayyorlaydi.

Shu bilan bir qatorda universitet tadbirkorlarni individual bo‘lishga o‘rgatadigan oliy ta'lim muassasasi sifatida yaratilgan. Universitetda sanoat bilan “qo‘shma ta'lim”ga qaratilgan o‘quv rejasi va ta'lim tizimi qabul qilingan bo‘lib, bu yerda nazariy bilimlar va amaliyotlar bir vaqtda o‘rgatiladi. Shu nuqtai nazardan, universitet Turkiya oliy ta'lim tizimida alohida o‘rin tutadi.

Universitet Times Higher Education (THE) Yosh universitetlar reytingi: mingyillik universitetlari reytingida 32 o‘rinni egallagan.

Toshkentda tashkil etilgan universitet Filialning asosiy vazifalari va faoliyati yo‘nalishlari quyidagilardan iborat:

ta'lim va ilm-fanning uzluksizligi va izchilligi tamoyili, shuningdek, jahon ta'limi va ilmiy xamjamiyatga uyg‘un integratsiyalashish asosida mutaxassislar, ilmiy kadrlarni tayyorlash va qayta tayyorlash tizimini rivojlantirish;

respublika oliy ta'lim tizimiga zamonaviy ta'lim texnologiyalariga asoslangan o‘quv jarayonini joriy qilish bo‘yicha ilg‘or xorijiy tajribalarni tatbiq etish, ochik axborot-ta'lim muxitini rivojlantirishga ko‘maklashish;

iqtisodiyot tarmoqlariga innovasiyalarni joriy qilishni rag‘batlantirish, ilmiy tadqiqotlar natijalarini tijoratlashtirish imkoniyatlarini kengaytirish, ta'lim oluvchilarning innovasion g‘oyalarini amalga oshirish uchun investisiyalarni jalb etish;

O‘zbekiston Respublikasi oliy ta'lim tizimining xalqaro nufuzini mustaxkamlash va uni mintakaviy ta'lim markazi sifatida tanitish;

mamlakat ijtimoiy-iqtisodiy rivojlanishining istiqbollariga muvofiq tadbirkorlik, iqtisodiyot, moliya, korporativ huquq, axborot-kommunikasiya texnologiyalari, psixologiya sohalarida xalqaro standartlar darajasida, jumladan, dual ta'lim texnologiyalarini qo‘llagan holda, yuqori malakali mutaxassislar tayyorlashni ta'minlash;

ta'lim va ilmiy sohalarda xorijiy mamlakatlarning yetakchi ta'lim muassasalari, ilmiy-tadqiqot markazlari bilan uzoq; muddatli aloqalarni rivojlantirish va mustaxkamlash;

Filialda o‘qitish kunduzgi ta'lim shaklida, davlat va ingliz tilida, jumladan, dual ta'lim, elektron va masofaviy ta'lim texnologiyalarini qo‘llagan holda Filial tomonidan tasdiklangan o'quv rejalari xamda dasturlarga muvofiq to'lov-kontrakt asosida amalga oshiriladi.

Filialda ta'lim faoliyati 2020/2021 ukuv yilidan boshlab amalga oshiriladi.

SSP Matbuot xizmati