“Davlat tashkiloti xodimlarini sinovdan o‘tkazish moduli” ishga tushirilmoqda.

O‘zbekiston Respublikasi Vazirlar Mahkamasining 2021 yil 13 martdagi “Davlat tashkilotlari xodimlarining huquqiy savodxonligini yanada oshirish chora-tadbirlari to‘g‘risida”gi VMQ-134-sonli Qarori imzolandi.

Mazkur Qarorga ko‘ra, davlat tashkilotlari xodimlarining huquqiy savodxonligi darajasini oshirish va baholash tartibi to‘g‘risidagi nizomi tasdiqlandi.

Davlat tashkilotlari xodimlarining huquqiy savodxonligini oshirish test sinovlari orqali baholanib, faqatgina yuridik xizmat xodimlariga tadbiq etiladi.

Adliya vazirligi tomonidan tegishli davlat tashkiloti bilan kelishilgan holda tasdiqlangan reja-grafik asosida davlat tashkilotlari xodimlarining huquqiy savodxonligi darajasini baholash har 3 yilda 1 marta tashkil etiladi.

Shuningdek, davlat tashkilotlarga birinchi marta ishga qabul qilinayotgan ish stajiga ega bo‘lmagan shaxslar  ishga qabul qilingan kundan boshlab 12 oy o‘tgach baholashdan o‘tkaziladi. Bunda, mas'ul va javobgar bo‘lib davlat tashkilotlari rahbarlari hisoblanadi.

Baholashning asosiy vazifalari quyidagilardan iborat:

•     davlat tashkilotlari xodimlarining amaldagi qonunchilik hujjatlari, shuningdek, qonunchilikdagi so‘nggi o‘zgarishlarlan xabardorligi darajasini aniqlash va bu boradagi bilimlarni muntazam oshirib borish;
•     o‘z faoliyatida fuqarolarning huquq va qonuniy manfaatlariga rioya qilinishini ta'minlash;
•     noqonuniy qarorlar qabul qilinishi, shuningdek huquqbuzarliklar sodir etilishning oldini olish;
•     davlat tashkilotlari xodimlarining huquqiy savodxonlik darajasini baholash orqali uning natijalarini doimiy ravishda monitoring qilib borish.

2021 yil 1 mayga qadar o‘quv mashg‘ulotlarini tashkil etish uchun zarur o‘quv dasturi, materiallar va test savollari bazasini shakllantiriladi hamda elektron platformaga joylashtirish uchun O‘zbekiston Respublikasi Prezidenti huzuridagi Davlat xizmatini rivojlantirish agentligiga taqdim etiladi.

Davlat tashkilotlari xodimlari O‘zbeikston Respublikasi Prezidenti huzuridagi Davlat xizmatini rivojlantirish agentligining Davlat xizmatining yagona elektron-axborot tahlil tizimidagi “Davlat tashkiloti xodimlarini sinovdan o‘tkazish moduli” orqali maxsus test tizimida onlayn test sinovidan o‘tkazish orqali baholanadi.

Baholash o‘tkaziladigan yilning tegishlicha 1 mart va 1 sentyabr' sanalariga o‘qitilishi va baholashdan o‘tishi lozim bo‘lgan xodimlar ro‘yhatini tasdiqlaydi vhamda uni Adliya vazirligiga taqdim qiladi.

Har bir xodim tomonidan 40 test savoli bajariladi. Buning uchun jami 50 daqiqa vaqt ajratiladi va har bir to‘g‘ri javob uchun 2,5 balldan baholanadi.

Baholash yakunlari bo‘yicha doimiy monitoring yuritiladi va monitoring  natijalari yuzasidan quyidagilar amalga oshiriladi:

•     uslubiy ko‘rsatmalar bo‘yicha takliflar ishlab chiqiladi va davlat tashkilotlari faoliyatiga tatbiq etish choralari ko‘riladi;
•     baholashdan o‘tmagan xodimlarni o‘qitish va qayta baholashdan o‘tkazilishiga oid ko‘rsatma beriladi;
•     o‘qitish tizimini kuchaytirish bo‘yicha tavsiyalar ishlab chiqiladi va davlat tashkilotlariga yuboriladi.

Xodimning baholash natijalari yuzasidan apellyasiya shikoyati natijalari e'lon qilinganidan so‘ng 5 kun ichida u ishlayotgan davlat tashkiloti tomonidan ko‘rib chiqilib, Adliya vazirligiga yuboriladi.

SSP Axborot-xizmati