O‘zbekiston Respublikasining O‘RQ-680-son 2021 yil 1 apreldagi “Dehqon xo‘jaligi to‘g‘risida”gi Qonunni mazmuni va mohiyati

Qonunning maqsadi – dehqon xo‘jaliklarini tashkil etish va yuritish sohasidagi munosabatlarni tartibga solishdan iborat.

Ushbu Qonun  6-bob va 33-moddadan iborat.

Dehqon xo‘jaligi - meros qilib qoldiriladigan umrbod egalik qilish yoki ijara huquqi asosida dehqon xo‘jaligi boshlig‘iga berilgan yer uchastkasida qishloq xo‘jaligi mahsulotlarini yetishtirishni va realizasiya qilishni dehqon xo‘jaligi a'zolarining shaxsiy mehnati asosida amalga oshiruvchi xo‘jalikdir.

Dehqon xo‘jaligi o‘z faoliyatini bog‘dorchilik va uzumchilikka yoki sabzavot va poliz ekinlarini yoxud boshqa qishloq xo‘jaligi ekinlarini yetishtirishga ixtisoslashish asosida amalga oshiradi. Mazkur xo‘jalik faoliyati tadbirkorlik faoliyatiga jumlasiga kiradi va uning a'zolarining istagiga ko‘ra yuridik shaxs tashkil etgan holda yoki yuridik shaxs tashkil etmasdan amalga oshirilishi mumkin.

Dehqon xo‘jaligini yuritish uchun berilgan yer uchastkalaridan maqsadli va oqilona foydalanilishi ustidan nazorat qonunchilikda belgilangan tartibda vakolatli davlat organlari tomonidan amalga oshiriladi.

Ushbu xo‘jalikning xo‘jalik faoliyatiga, shu jumladan ular tomonidan yetishtiriladigan qishloq xo‘jaligi ekinlarini tanlashga, ishlab chiqariladigan hamda realizasiya qilinadigan qishloq xo‘jaligi mahsulotlariga narx belgilashga davlat organlari va tashkilotlarning, ular mansabdor shaxslarining aralashuviga yo‘l qo‘yilmaydi.

Qonunda dehqon xo‘jaligi boshlig‘ining huquq va majburiyatlari ko‘rsatilgan bo‘lib, ular quyidagilardan iborat:

- dehqon xo‘jaligi nomidan ishonchnomasiz ish yuritish;

- yuridik va jismoniy shaxslar bilan shartnomalar tuzish;

- o‘ziga meros qilib qoldiriladigan umrbod egalik qilishga berilgan yer uchastkasini yoki shu uchastkasining bir qismini dehqon xo‘jaligining ixtisoslashuviga muvofiq qishloq xo‘jaligi mahsulotlari ishlab chiqarish maqsadida, mazkur yer uchastkasiga bo‘lgan meros qilib qoldiriladigan umrbod egalik qilish huquqini saqlab qolgan holda, yuridik va jismoniy shaxslarga vaqtincha foydalanishga berish;

- ishonchnoma berish;

- bankda hisobvaraqlar ochish.

Dehkon xo‘jaligi mazkur xo‘jaligini yuritish uchun meros qilib qoldiriladigan umrbod egalik qilish huquqi asosida berilgan yer uchastkasiga bo‘lgan huquq tugaganda yoki ijara muddati tugaganda tugatiladi.

Ushbu Qonun rasmiy e'lon qilingan kundan e'tiboran kuchga kiradi.

SSP Axborot-xizmati